E ta zona stranjo, casi sigur abo cu ta lesando, ta pensa con por ta posibel, pero nos ta bay mustra bo con esaki por sosode, anto pa bo compara e tempo cu nos ta bibando aden, y bira mas cuidadoso cu bo Famia.
Beibel ta bisa cu , Rey Herodes a aresta Juan Bautista y pone den prison , pasobra e a bisa Herodes cu no ta bon pa bo ta biba cu Herodias esposa di bo ruman Felipe. Herodes tatabtin miedo pa mata Juan Bautista , pero den su celebracion di cumpleaños , e yiu muher di Herodias a baila dilanti Herodes , pesey Herodes a priminti bao di huramento pa dune locual cu e ta pidi, y e mucha muher a pidi cabes di Juan Bautista y Herodes a duna ordo pa kap cabes di Juan Bautista kita afo y nan trece riba un teblachi y e mucha muher a entrega e cabes na su mama.
Awor den e tempo cu nos ta bibando esaki ta sosode , caminda un mayor ta bisa un yiu tocante su comportacion of su forma di biba, e yiu ta cohe su caminda bay for di cas, pasobra e berdad ta ofende, hopi biaha un persona ta wordo corri for di un organisacion, pasobra e a papia berdad, y ora bo ta papia berdad bo presencia no ta agradabel.
Cuanto biaha nos ta bisa un yiu of un famia cu locual cu e ta haci , no ta den boluntad di Dios, Dios no ta agrada den esey, y e ta prefera kibra Amistad cu bo ,pa asina no busca cara di Dios.
Hopi biaha un matrimonio ta kibra , yiunan ta core peliger, famia ta perde cas , yiunan mester wordo parti rond cu tur e peligernan existente , djis pasobra e berdad a bira un ofensa.
Violencia domestico a bira un arte , pasobra berdad a bira un ofensa, asina bo reclama y bisa berdad e persona ta prefera di bringa cu bo y no acepta cu locual e ta haciendo ta for di ley, y mas ainda for di boluntad di Dios.
Stop di droga, stop di bebe, hala for di caya, cria bo yiunan,kibra cu bida di deshonesto, aparta di passion bergonsoso,entrega bo bida na Hesus Cristo, Honra bo tata y bo mama, ora bo menciona e cosnan aki e berdad ta bira ofensa.
Awendia e berdad por hibabo te dilanti di Juez , sea bo ta rectifica of paga boet, pasobra locual bo a bisa ta berdad , pero den e tempo cu nos ta biba aki boluntad di Dios ta wordo poni un banda, pa boluntad di hende prevalece.
Juan 14;6 Hesus a bise: Ami ta E caminda, E berdad y E bida ningun hende no ta bini serca E Tata , si no ta pa medio di Mi. Ora nos rechasa e Berdad nos ta rechasa Cristo Hesus.
Ora bo lanta bo yiunan den caminda di Señor bo ta un bendicion pa nan, y un bendicion pa bo mes, y como mayor bo ta un bendicion di Dios.
Nos ta den tempo dificil, segun 2 Timoteo 3 cual ta bisa cu nos ta den tempo trabahoso, cual ta pone esnan cu ta papia berdad ta wordo persigi, pa asina maldad por domina.
Ora bo papia berdad, bo ta wordo tuma . como un persona cu ta huzga, esey ta nifica cu nos tin cu tuma malo y bagamunderia, y perversidad, y inmoralidad acepta nan como bon, bay di acuerdo y yama nan bon bini den comunidad, pasobra tempo ta mustra cu E BERDAD A BIRA OFENSA.
Awe mas cu nunca nos ta pidi oracion pa nos dushi Isla den un tempo Trabahoso.
