Ora un persona hinca den su cabes cu e no por logra algo, ta e mes ta sera porta pa su mes, pero ora un persona pone su Fe den Dios pa e logra, no tin nada pa stroba.
Especialmente ora ta trata di nos yuinan, nos mester para fuerte nan tras, pa tur cos positivo cu ta agrada Dios cu nan kier logra.
Ora bo no ta hanja apoyo di ningun hende ta tempo pa pone bo confiansa y bo speransa completamente den Dios.
David no tabatin apoyo di ningun hende ora e mester a enfrenta Goliat, su propio ruman tabata pensa cu e a bini pa wak e bataya, pero David a bini pa derota e gigante.( 1 Samuel 17:28-49)
Rey Saul a bise cu e no por, y hasta ofrece su armadura, pero nada di esey no tabata pa David , pasobra semper ora David a enfrenta un animal cu kier a cohe su carnenan e a enfrenta e animal den nomber di Dios.
Hopi biaha ora un mucha ta sali cas, bo ta tende su mayor bise, bay cu Dios, y hopi no sa e poder cu nan a caba di expresa riba bida di nan yiu.
Pasobra ora nos cana cu Dios nos tin tur cos.
Ora nos cana cu Dios nos por enfrenta tur cos.
Ora nos cana cu Dios nos tin e victoria .Si Dios ta cu nos , ken contra nos.
Ora nos ta cana den boluntad di Dios, ningun hende, ni nada cu hende kier usa contra nos lo por haci nos daño.
Dios a bisa Josue: Ningun hende lo por para bo dilanti tur e dianan di bo bida.
Mescos cu Mi tabata cu Moises asina lo Mi ta cu bo, lo Mi no fayabo , ni tampoco bandonabo.(Josue 1:5).
Moises a bisa Señor, Mira mi no ta papia bon , con Farao lo scuchami.
Dios por haci cosnan grandi cu nos si nos pone nos confiansa totalmente den Dios.
Ora Dios duna bo un plan no cana papia cu tur hende, pasobra tin hende por descurasha bo, of nan ta capas di convensebo cu bo no ta bay logra pa despues nan hacie , of laga otro hende hacie pa nan.
Nunca balota ningun idea cu Dios a dunabo, pasobra ta abo Dios a dune y ta Dios su deseo pa bo prospera.
Hose su rumannan tabata mire como un soñado, pero su soño a hibe asina lew te e a bira gobernador di Egypto y asina por a provee cuminda pa henter su pueblo.
Jefte di Galaad su rumannan a menosprecia, y a balota Jefte, pero ora e pais a cay den guerra, ta Jefte mes a resulta e homber balente.
Pablo tabata un persigidor di cristian den su ignorancia, pero despues cu e a conoce Cristo e a bira esun cu a ricibi revelacion di e palabra di Dios, y asina e por a scirbi 2/3 parti di testament nobo.
Laga bo confiansa den Dios resalta riba tur locual ta palabra di hende.
No ta importa kico bo a pasa aden, porta bo tabata un preso, y ta parce manera porta ta sera pa bo, pero si bo pone bo confiansa den Dios, e luz di Dios lo briya pa bo, pasobra esun cu confia den Dios lo no keda brongosa.
Pasobra wowo di Señor,ta move bay bin door di henter tera, pa E por sostene fuertemente, esnan cu nan curazon ta completa mente di dj’E.(2Cronicanan 16:9)
