Di berdad, di berdad esey ta algo cu mester sosode , y tambe nos mester remarca cu sin Fe ta imposibel pa agrada Dios.Ta tempo pa reconoce y acepta cu Hesus Cristo ta nos Señor, y Salbador, e unico caminda di berdad y bida pa nos yega serca e Tata.
Laga nos kere den Dios y no depende riba nos propio forsa. Pasobra materialismo, placa, poder, y idolatria ta hala hende for di Dios.
Pero Dios den su imenso misericordia ta demostra cu aunke nos por ta infiel, Dios semper ta fiel na nos, y ta pesey e a manda su unico yiu pa muri na cruz pa nos.
Den e buki di Daniel Capitulo 3 vers 1 te cu 30 ta conta nos e historia di rey Nabucadonosor kende a traha un imagen di oro grandi y a pasa un ley cu esnan cu tende zonido di (musica) cu ta consisti di cacho, fluit, tamborin, arpa, siter , doedelzak, y tur sorto di musica, nan mester tira nan curpa abao y adora e imagen di oro. Ma esun cu no tira su curpa abao y adora lo wordo tira den forno di candela , cayente cayente.
E adoracion di Dios falso, cu musica y baile ta purba infiltra mundialmente den e pueblo di Dios y wak bon , ta e hubentud a restiti e ponencia di adora Dios falso cu baile y musica,( Tres hoben Sadrac, Mesac y Abednego) pasobra musica y baile cu ta provoca y lanta e carni ( Romasnos 8:8) no ta di Dios. Y e enemigo ta usa locual hende gusta pa sluip drenta y destrui, nan relacion cu Dios. Y awor ken bo ta sirbi e musica of Dios?
Nos mester tene bon cuenta ora nos ta canta, dansa, of baila kico nos curpa ta expresa. Satanas no a cambia su strategia, e ta mesun colebra bieuw di semper. Y tin hopi tipo di baile y danza awendia cu hende tin di move manera colebra.(Piton of Cobra). Pero nos Dios ta Santo y nos ta Adore den Spirito y Berdad.,
Un biaha mas den e buki di Daniel Capitulo 6 completo, Rey Dario a haña ta bon pa firma un decreto cu esnan cu haci peticion na otro dios, y no na e rey , nan lo wordo tira den cueba di leon.
Pero Daniel a keda haci oracion na Dios tres biaha pa dia cu bentana habri den direcion di Jerusalem. Esey a causa cu Daniel a wordo tira den cueba di leon, y como Daniel tabata agrada Dios, y sirbi Dios constantemente Dios a libre for di boca di leon.
Kico lo pasa si awor aki tipo di ley idolatra wordo pasa, pasobra den mundo ta lantando lidernan idolatra sin Dios ,cu ta desea pa nan wordo adora . Pero no lubida locual Galationan 1 vers 10 ta bisa..
Kico lo pasa ,nos lo mantene nos Fe den Cristo y perde nos bida?
Of nos lo salba nos bida y entrega nos Fe den Cristo Hesus?
Pasobra tin leynan na caminda cu lo tembla fundeshi spiritual di hopi hende riba e mundo aki.
No lubida cu despues cu Cristo Hesus bin busca su pueblo ( 1 Thesalonisensenan 4 vers 13-18) e anticristo lo domina e mundo aki y e lo exigi adoracion y marca, tur hende sino nan lo wordo mata.
Pesey nos tur mester agrada Dios y ricibi Su Yiu Cristo Hesus den nos curazon y pa asina nos tin bida eterna.
