Den Mateo 13:26 -30-41 ta para scirbi : Y ora cu e trigo a spruit y a forma tapushi, e yerba shimaron tambe a keda bisto. Esey ta pa nos tur ta na altura cu e trigo y e yerba shimaron ta crece hunto.
Ken ta e trigo? Esey ta e bon simia cu Hesus a sembra .
Y ken ta e yerba shimaron? Esey ta e mal simia cu e diabel a sembra. ( Mateo 13:38-39)
.Con bo ta reconoce e diferencia entre trigo y yerba shimaron?
Bo ta conoce na su fruta: E trigo ta duna fruta di obedencia y humildad.
Pero e yerba shimaron ta duna fruta di orguyo, rebeldia y inmoralidad.
E esclavo a bisa e doño di cunuco cual ta Cristo Hesus, Bo kier pa nos bay y recohe e yerba shimaron for di e maishi?
Hesus a contesta: No pa no sosode cu mientras boso ta recohe e yerba shimaron, boso ranca e trigo tambe hunto cune.
Laga tur dos crece hunto te na cosecha. Y e Yiu di hende lo manda Su angelnan y nan lo recohe for di Su reino, tur piedra di trompica y esnan cu ta haci inikidad , y lo tira nan den forno di candela.
Ningun hende por separa e trigo for di e yerba shimaron, Señor mes lo manda su angelnan pa hacie.
Si nos no tin pasenshi y kier haci algo cu Dios no a manda nos, nos lo causa problema grandi.
Pesey den 2 Corintionan 5:18 ta para scirbi lo siguiente: Awor tur e cosnan aki ta bini for di Dios, Kende a reconcilia nos cu Su mes door di Cristo y a duna nos e ministerio di reconciliacion .
Esta cu Dios den Cristo tabata reconciliando e mundo cu Su mes sin tuma nan picanan na cuenta,y E a encarga nos cu e palabra di reconciliacion.
Pesey nos ta embahadornan pa Cristo, como sifuera Dios tabata spierta door di nos,nos ta roga boso den nomber di Cristo , sea reconcilia cu Dios.
Un embahador den Cristo ta pone su mes interes un banda pa e sirbi Cristo, y no ta traha segun programa di hende, pero segun palabra di Dios.
No lubida locual ta para scirbi : No laga ningun hende gaña boso, Mal compania ta daña bon custumber. ( 1 Corintionan 15:31).
Un embahador den Cristo mester tin contacto constantemente cu e trono di Dios ( Daniel capitulo 6).
Un embahador den Cristo mester ta firme y fiel ( Efesionan 6:20).
Un embahador den Cristo no ta sirbi ningun clase di interes politico, ni tampoco ta compremete su mes cu hende , tampoco tin favoritismo.( Galationan 1:10).
E yamada di un embahador den Cristo ta sagrado, puru, sin envidia, y liber di tur clase di corupcion.
E encargo di reconcilia hende cu Dios, ta mas grandi di locual hende por kere, pasobra nos ta yama pa reconcilia esnan cu ta den scuridad cu Dios,pa ranca nan saca for di gara di diabel, pasobra e embahador ta funciona segun e Palabra di Dios ta indica nos den Mateo 11:28).
E tempo di cosecha ta serca y Cristo Hesus ta cla para pa manda su angelnan pa recohe e cosecha, y asina e separacion lo tuma lugar, e bon simia pa bida eterno y e yerba shimaron pa morto eterno.
No lubida: Un mensahero malbado ta cay den adversidad,ma un embahador fiel ta trece curamento.( Proverbionan 13:17).
Nos ta embahador den Cristo Hesus, pa gana alma pa Dios, y trece nan na e berdad cu ta haci nan liber.