No ta tur Hoben ta Malcria, Mala mucha, Bandido, Shouro, Absolutamente cu NO, pero nos hubentud mester di oracion, pasobra tin hopi mal influencia den aire, riba internet, y tin hasta hende grandi ta duna mucha mal ehempel.(Efesionan 6 v 12),
Tur mucha ta corre mes un peliger tanto mucha homber , como mucha muher, ya no ta tempo mas cu nos como mayor por laga nos yiu haci locual cu e kier y bisa ta homber e ta ,pasobra nos mes ta habri mal caminda pa e mucha.
1 Pedro 5 vers 8 ta bIsa; Sea sobrio , sea alerta, Boso adversario e diabel , ta cana rond manera un leon cu ta gruña buscando ken e por devora.
Nos como mayor no por cana wowo sera, of wak yiu di otro hende, y compara y bisa mi yiu si ta bon mucha, e tempo ey a pasa, nos bibando den un tempo cu nos mester pone nos yiu mas tanto posibel den oracion y tene contacto cune cara cu cara evita di tin un yiu telefonico, of un yiu digital.
Pasobra diabel si no ta digital ni tampoco telefonico e a bini pa horta , mata y destrui, y su meta pricipal ta e hubentud pa asina daña nan futuro pa nan keda den su gara..
Cada hoben sea mucha homber / muher cu ta usa droga. sea tiki of hopi ta cana den scuridad, y mester di ayudo pa sali for di e cos ey prome cu e bira adicto.
Cada mucha homber/muher cu ta cana cu arma ta cana den sombra di morto, pasobra un momento of otro e por herida of mata hende, of hende por heride of mate.
Hopi hende no kier tende cu tin hopi arma riba caya, pero berdad ta, si ta un arma mes tin riba caya e ta un peliger, pasobra un arma den man di un hende cu no tin permiso pa carga arma, of no ta autorisa pa carga arma ta un arma ilegal. Y ora arma cay den man di hoben nos tur tin hopi experiencia y tristesa di e consequencia.
Salmo 107vers 14 ta bisa: El a saca nan for di scuridad y for di e sombra di morto, y a kibra nan cadenanan na pida, pida.
Droga y arma ta cadena hende na scuridad y na morto. Beibel ta splica nos den 1 Juan capitulo 3 vers 15: Ken cu ta odia su ruman ta un matado, y boso sa cu ningun matado no tin bida eterno ta permanece den dje.
Nos mester laga e hubentud compronde, cu canamento cu arma, di cualkier tipo for di esun di mas chikito cu tin, te na e arma di candela , ta haci bo morto spiritual, pasobra bo ta cana cu mal pensamento.
E combinacion di droga y arma ta un diablura completo , cu ta pone nos como mayor lanta nos oracionnan mas ferviente posibel, pasobra tin hopi mama , no por drumi anochi, y tin hopi tata preocupa, tin di nan ta na altura cu nan yiu tin arma, of ta cana cu hende cu tin arma, ta ora e mucha yega cas, nan ta trankil, pero tambe tin un preocupacion cu nan no sa kico e a haci riba caya, pa motibo cu e ta usa droga of bende droga y ta cana cu arma.
Dios tene misericordia y yuda tur mayor, pasobra solamente oracion y ayuno na Dios ta kibra cadena di maldad.
