Nos rosea y nos bida ta bini for di Dios, hende no ta funciona automaticamente, manera hopi ta kere y ta hala for di nos centro di comunicacion cual ta Dios y ta pone man confiansa den material.
Tin hopi hende ta confia den placa, tin ta confia den poder, tin ta confia den imagen nan traha pa man di hende, tin ta confia den bruheria, horoscope etc . Pero bendiciona ta tur esnan cu ta confia den nos Dios Todopoderoso, kende a traha cielo tera y laman,pasobra nunca nan lo pasa berguensa,
Jeremias capitulo 17 vers 7+8 ta bisa:Bendiciona ta e hende cu ta confia den Señor y kende su confiansa ta den Señor, pasobra e lo ta manera un palu planta canto di awa, cu ta manda su raisnan bay na un corida di awa, y cu lo no tin miedo ora calor bini, ma su blachi nan lo ta berde , y den aña di secura e no ta preocupa, ni laga di duna fruta.
Salmo 118 vers 8 ta bisa; Ta mihor tuma refugio den Señor cu confia den hende.
Salmo 146 vers 3 ta bisa : No confia den prinsnan den yiu di hende, den kende no tin salbacion.
Con nos ta bira dependiente di Dios?
Arepenti y aparta di bo picanan, y entrega bo curazon na Cristo Hesus.
Humiya bo mes den Su presencia.
Confia den Su Palabra,
Lesa Su palabra
Pasa tempo den oracion.
Alaba Dios pa Su fieldad.
Warda riba Dios.
Den Juan capitulo 6 vers 38 Hesus ta bisa; Pasobra mi a baha for di cielo no pa haci Mi mes boluntad , sino e boluntad di Esun cu a mandami.
Y nos mester ta imitadornan di Hesus, haciendo boluntad di Su Tata cu ta den cielo.
Cada bes cu nos expresa nos necesidadnan na Dios, nos confiansa den Dios ta aumenta, y nos ta crece spiritualmente, y bira mas dependiente di Dios.
Den e buki di Isaias capitulo 36 y 37 Rey Senaquerib di Siria a invadi Juda cu un ehercito hopi grandi, y a cohe nan deposito di awa di bebe y asina cu no tabatin awa pa bebe, soldaat no por a bringa pa motobo di sed y hasta muhernan tabata perde nan baby.
Y e invasor Senaquerib a manda un carta pa Rey Ezequias den cual e ta bisa pa entrega e pais, como cu no tin otro salida, sino e ta mata tur hende. Rey Ezequias a cohe e carta y a presenta e carta dilanti di Dios Todopoderoso dependiendo riba Dios solamente, pasobra e no tabatin placa ni tampoco soldaat den posicion pa bringa, y Dios a scucha su oracion , pero den su oracion na Dios e a bisa lo siguiente: Y awor O Señor nos Dios, libra nos for di su man, pa tur hende di mundo por sa cu Abo so , Señor ta Dios.
Esey ta un rey cu a pone su confiansa den Dios y Dios a manda un angel y a salba e pais y tur su habitante nan.
Esaki ta un historia berdadero pa tur esnan cu ta questiona e palabra di Dios lesa pa nan mes y siña kere , confia y depende completamente riba Dios.
Awendia den hopi cos nos ta laga Dios afo y confia den nos propio forsa, estudio,poder politico,y financiero, pero Salmo 37 vers 5 ta recorda nos lo siguiente : Encomenda bo caminda na Señor , confia den Señor y E lo hacie.
