E manera cu nos hubentud ta actualmente, nan mester di wordo guia den e amor di Cristo Hesus.
Nos como mayor nos mester cuminsa, proclama, y declara bendicion riba bida di cada hoben cu nos ta mirando, y cuminsa for di den nos cas, riba nos yuinan y nietonan.
Ta un avalancha di bagamunderia e diabel ta tirando riba nos muchanan, y nos como hende grandi mester para banda di nos hobennan pa asina siña nan rechasa y reprende tur trampa di e enemigo.
Ta un berguensa ora hende grandi ta dirigi mucha den caminda di berguensa, inmoralidad y abominacion. Pasobra nos como hende grandi ta yama pa nos ta un mentor positivo pa nos hubentud.
Wow , con por ta posibel cu esnan cu mester guia mucha riba bon caminda, nan mes ta piedra di trompica pa nos muchanan. Riba ken nos muchanan tin cu wak?
Di tur banda e enemigo ta atacando nos muchanan, den cas di famia, na scol, den bida social, y hasta den nan futuro bida sexual e enemigo kier impone locual ta contra boluntad di Dios.
Ta ora pa nos como mayor lanta ariba y cuminsa haci oracion y proclama bendicion riba bida di tur hoben, pasobra e enemigo ta buscando nos hubentud pa perhudica nan futuro den tur aspecto.
Nos tur sa cu e ladron ta bin pa horta mata y destrui y cu Cristo Hesus a bini pa duna bida, y pa nos tin bida na abundancia.( Juan 10:10).
Laga nos yiu hombernan den nan hubentud , ta manera mata cu a crece bira grandi,y nos yiu muhernan manera pilar di skina, traha manera un palacio.( Salmo 144:12).
Nos tur ta na altura cu nos ta bibando den tempo trabahoso, un tempo den cual cada cas di famia mester di Cristo Hesus.
Un tempo den cual hende a perde amor pa otro,y bira materialista ,no ta pordona ,no ta respeta , no ta corda riba otro pero solamente riba nan propio interes.
Caminda hende a bira ireconciliabel, orguyoso, sin amor, arogante, y tur esaki nan ta wordo manifesta awor bao di nos hubentud, pero esaki mester sirbi como ehempel pa nos alsa nos clamor na Dios, pasobra si tabatin un tempo cu hubentud mester di nan mayor ta awor.
Ora nos ta papia cu nos yuinan den cas, nos mester tene cuenta cu nos expresionnan no ta causando herida, pasobra hopi biaha como mayor expresionnan den direccion di nos yuinan ta hopi ofensivo.
Nos tur sa cu ofensa ta causa herida y den caso di un mucha e ta strobe, di avansa especialmente ora e ta tende tur dia cu e no ta sirbi pa nada.
Ningun mucha no ta crece bon den un ambiente negativo, pasobra negativismo ta stroba crecemento den tur cos, no lubida cu hasta un mata mester di awa pa e crece.
Efesionan 4:29 ta para scirbi: No laga ningun palabra dañino sali for di boso boca, sino solamente palabra cu ta bon pa edificacion . Conforme e necesidad di e momento, pa esaki por duna gracia nan esnan cu ta tende.
Ningun mucha no por wordo educa cu zundramento y cu golpi den ambiente di violencia, pero nan mester wordo educa den e boluntad di Dios, pa na prome lugar nan sa cu Dios ta doño di tur cos y tur locual ta bon ta bini for di Dios.
Mester siña tur hoben pa nan comporta nan mes decentemente, stima otro cu amor fraternal,dedica nan mes na oracion, pasobra esey ta e boluntad perfecto di Dios.
Laga nos uni pa pidi Dios salbacion pa nos hubentud.