Aunke cuanto maldad, por avansa riba e mundo aki, aunke cuanto hende kier rebeldia, y resisti e bondad di Dios, e Gloria di Dios ta manifesta tur dia riba e mundo aki .
Dicon esey ta sosode? Pasobra nos Dios ta:
Nos Tata,
Esun Berdadero,
Omnipotente,Soberano,Dios di Compasion,
Dios di Misericordia,Defensor, Sanador, Proveedor,Salbador, Creador, E ta Glorioso.
Kico ta nifica Gloria? Awel Gloria ta nifica e distincion mas halto cu nos por duna solamente na Dios.
Y Dios no ta comparti su Gloria cu ningun hende, cu ningun imagen, nada traha cu man di hende no por carga e Gloria y Presencia di Dios.
Pesey hende mester tene bon cuenta, na kico nan ta ofrece alabansa y adoracion, pasobra solamente Dios merece tur honor y gloria.
Ciencia por aumenta, techonologia por avansa, pero nada por reemplasa e Gloria di Dios, e mundo ta yen di e Gloria di Dios.
Cada mainta ora nos lanta for di nos cama, nos por mira e expresion di e Gloria di Dios den nos tur cos.
Hopi ta esnan cu e enemigo a bruha nan mente, pa nan no alaba y glorifica e nomber di nos Señor, nan ta mara den scuridad, y no ta realisando kico nan ta perde, pasobra tur cos ta depende con nos ta biba awe , pa asina nos mira e Gloria di Dios mayan cu Dios kier.
Boso anto stimanan, sabiendo esaki di antemano,tene cuidao,pa boso no wordo lastra hiba pa medio di e error di hombernan malbado,y boso cay for di boso mes firmesa,ma crece den e gracia y conocemento di nos Señor y Salbador Hesus Cristo .Na E sea e gloria awor y te na e dia di eternidad, Amen.( 2 Pedro 3:18).
E mundo ta yen di e Gloria di Dios, scuridad no por vence claridad, pasobra claridad ta bini di Dios, y den nomber di Cristo Hesus, nos lo vence tur trampa di e enemigo.
Den tur hogar e Gloria di Dios mester manifesta, pasobra tur rudia mester dobla, y tur lenga mester confesa cu Hesus Cristo ta Señor.
Pa tur esan cu ta kere, Dios ta precioso, pero pa esnan cu no ta kere, esnan cu ta haci bofon,esnan cu ta chercha, esnan cu ta rebeldia, esnan cu kier dividi Su creacion, pa nan e ta un piedra di trompica pasobra ta para scirbi:
E piedra cu e trahadornan a rechasa, esaki a bira e piedra di skina principal.Un piedra di trompica y un piedra di ofensa.
Asina awor hopi hende ta bisando ora bo coregi, of bisa nan e berdad, pa bo no husga nan, pero no ta abo como persona ta husga ningun hende, pero e palabra di Dios ta primi consenshi di tur esnan cu ta den desobedencia, cu mirando e grandesa di Dios y toch no kier acepta e berdad.
No na nos O Señor , no na nos,ma na bo nomber tur e Gloria, pa motibo di bo misericordia, y pa motibo di bo berdad,( Salmo 115:1).
Pesey cada dia den nos bida , nos mester mengua pa asina Dios por crece den nos bida, pasobra orguyo y arogancia, rabia, envidia, y amargura, tur lo stroba hende di mira e gloria di Dios.
Pasobra di dj’E ,y door di dj’E tur cos ta . Na E sea gloria pa semper.( Romanonan 11:36).
Dios ta E creador di tur cos, e diabel nunca a crea nada, y tampoco lo crea nada nunca, e ta usa mente y curpa di e esnan cu te ainda ta resisti e berdad di Dios, pa pone nan haci maldad, na nan mes curpa y na otro nan.
Na Dios tur e Gloria.
