Pa motibo cu hende a aparta for di Dios, su palabra y su caminda, bira egoista, arogante y orguyoso.
Nos tur por mira, kico ta sosode ,ora hende kier haci tur cos riba nan mes y a lubida riba Dios, y mientras tanto cu hende no pone Dios na prome lugar, sota lo bini y sota lo bay, te na momento cu hende reconoce, manera Job ( Job 42;2) cu Dios ta soberano.
E amor pa Dios mester wordo sembra den famia, den e muchanan for di chikito, y e mayornan mester demostra cu nan actitud cu nan stima Dios di henter nan curazon y cu tur nan forsa.
Esaki no ta fanatismo, tampoco religiosidad, pero esaki ta un prioridad , pa nos pone Dios na prome lugar den nos bida, pa tur cos bay nos bon.
Tene cuenta cu lo siguiente:
Salmo 97 :10 ta bisa: Boso cu ta stima Señor odia maldad, E ta preserva alma di su santonan, E ta libra nan for di man di e malbado.
Salmo 116:1+2 ta bisa: Mi ta stima Señor pasobra e ta tende mi bos y mi suplicanan, Pasobra E a inclina su orea na mi pesey lo mi sclama na djE, tanten cu mi ta biba.
Mateo capitulo 22:37-38: Hesus a conteste: Stima Señor bo Dios cu henter bo curazon, cu henter bo alma y cu henter bo mente y stima bo prohimo manera bo mes.
Romanos capitulo 8:28 Y nos sa cu Dios ta haci tur cos obra hunto pa bon, pa esnan cu ta stima Dios, pa esnan cu ta yama segun su proposito.
1 Corintionan 8:3 Ma si un hende ta stima Dios e ta conoci pa Dios.
1 Juan capitulo 2: 15; No stima mundo y e cosnan di mundo, si un hende ta stima mundo e amor di e Tata no ta den dje.
1 Juan capitulo 3:7 : Yiu chikitonan no laga ningun hende gaña boso , esun cu ta practica husticia ta husto, mescos cu E ta husto, esun cu ta pratica pika ta di diabel , pasobra diabel a haci pica for di principio, Y e yiu di Dios a aparece pa e proposito aki, pa e destrui e obranan di diabel,
Pa medio di tur e Palabranan aki nos mester reconoce y hala mas cerca Dios, y evita di cay den e ola di maldad, cu ta creciendo cada dia mas y mas y cu no ta respeta, pero nos mester corda cu Dios a stima nos prome y a entrega su unico yiu pa nos.
Laga nos trata Dios cu seriedad, pasobra Señor sa ken ta fiel, ken tin doble animo, y ken ta bofonador y cherchado, y ora hende su actitud ta asina nan no por spera nada di Dios.
1 Juan 4: 20 ta bisa: Si un hende ta bisa e ta stima Dios, y ta odia su ruman, e ta un gañado, pasobra esun cu no ta stima su ruman cu e a mira , no por stima Dios kende e no a mira.Esun cu stima Dios mester stima su ruman.
Ta e amor di Dios den nos ta pone nos pordona y lubida.
Ta e amor di Dios den nos ta pone nos ta fiel den matrimonio.
Ta e amor di Dios den nos ta pone nos lanta nos yuinan den caminda di Dios.
Pega na Dios nos por tur cos.( Juan capitulo 15).
Nos amor pa Dios ta importante.
