E ta para scirbi cu den ultimo tempo lo bini hopi consehero, cual ta conseha segun nan propio sentimento, yen di filosofia, cu lo gaña, cu nan conseho no ta respeta palabra di Dios, nan consenshi ta kima, no ta importa ken nan perhudica, basta nan conseha, pasobra nan meta ta inmoralidad y asina coopera cu maldad.( 2 Timoteo 3:6-9).
Bo ta haña nan tur caminda: hopi biaha bo ta puntra bo mes con un hende despues di duna su palabra como un homber ta bandona su cas y no ta cria su yiunan?
Con un hende cu su propio boca ta kibra su famia?
Con un hende ta maltrata mama di su yuinan den nan presencia?
Con un muher por pone tur responsabilidad un banda, y bandona su hogar y sali di paranda cu amiga, y termina kibrando auto den palu di lus pa motibo cu e ta burachi?
Con un hoben, cu a wordo lanta cu respet den cas, por lanta contra su mayornan, cu palabra sushi y menasa, y asina resulta den man di polis.
Tur conseho cu no ta respeta e palabra, principio, y mandamento di Dios, ta mal conseho, y lo trece tristesa, dolor y hasta morto..
Nos ta bibando den un tempo cu hende, kier sigi hende mas cu nan ta sigi Dios, nan kier complace pa mantene amistad, of permanece den un puesto, tin caso caminda un hefe di trabao sa masha bon cu tin infieldad ta tuma lugar riba su departamento, pero pa amistad, miedo of pa demostra cu e ta bon guy e no ta para e bagamunderia..
Ora un hende ta integro, e no ta integro pa su mes solamente, sino pa tur locual ta pasa rond di dje, pasobra integridad ta bini di Dios, y ora bo ta integro, nada cu ta bay contra boluntad di Dios, bo no por aproba.
Si Dios ta bisa no, ta imposibel pa hende bira e asunto y bisa si, pasobra Dios no ta laga hende haci bofon di dje, tur locual hende sembra nan lo cosecha.
Awor maldad di hende a crece asina tanto cu nan no ta worry cu Dios,basta nan logra nan meta temporal y bijbel ta papia cla di esey den 2 Timoteo 3:1-5.
No ta exisiti conseho contra e palabra di Dios, e palabra di Dios ta santo, firme y berdadero, y ta keda estableci pa eternidad,
Como mayor nos tur mester wak serca ken nos ta tuma conseho, pasobra mundialmente e plan di e enemigo pa gara e cabes di hogar cual ta e tata, pa gara cabes di organisacion, gobernantenan , presidente di pais, pasobra una bes cu enemigo tin e cabes den su gara, e por domina e curpa.
Pasobra cu tur sorto di palabra dushi e malbado ta presenta , pero esnan cu conoce Dios lo lanta para y reconoce, cu locual cu ta wordo presenta ta contra e palabra di Dios, y asina no por acepta nada di esey.
No participa den obranan infructifero di scuridad, sino mas bien expone nan, pasobra ta berguensa hasta papia di cosnan cu nan ta haci na secreto.Ma tur cos ta bira visibel ora nan wordo exponi na lus.( Efesionan 5:11-13).
Palabra di Dios ta exigi nos obedencia, pasobra tur rudia mester dobla y tur lenga mester confesa cu Hesus Cristo ta Señor.
Den e palabra di Dios tin poder pa salbacion, sanacion, reconciliacion, y refugio pa nos bida nos cas y nos famia.
E palabra di Dios ta e guia pa nos bida, nos mester rechasa tur locual ta contra e palabra di Dios.