Isaias capitulo 57 vers 20+ 21 ta para scirbi: No tin pas pa e malbaldonan “mi Dios ta bisa.
Drecha, drecha, prepara e caminda, kita tur obstaculo for di caminda di Mi pueblo,Pasobra esun Halto y sublime , Kende ta biba pa semper. Kende su nomber ta Santo, ta bisa:
Mi ta biba den un lugar halto y santo, y tambe hunto cu esnan humilde y di spirito kibra, pa rebiba spirito di hende kibra y pa rebiba curazon di e humilde.( Isaias 57 vers 14+15)
Como mayor nos mester guia nos yuinan riba e caminda di Dios, pa nan sa con nan tin di cana , cu respet y temor di Dios, no den nan propio orguyo y arogancia, pero cana den e berdad di Dios, den paso limpi cual ta hiba na bendicion y santidad.
E caminda di maldad ta grandi y dia pa dia e ta bira mas grandi, e ta modernisa, e ta sofistica, cu ta expande su trampa den tur area, pa asina gara esun cu no tin temor di Dios, y esnan cu biba pa deseo di hende.
Laga tur amargura, furia, rabia,griteria y calumnia wordo kita for di boso, hunto cu tur malisia. Y sea cariñoso cu otro y pordonando otro , mescos cu Dios den Cristo a pordona boso.(Efesionan 4:31).
Mayornan mester ta un base di bondad, un caminda di bon ehempel, un recurso di amor, un fuente di instruccion drechi, di coreccion y no di trasteria y malcriansa, teniendo contacto cu Dios constantemente, pa ricibi guia.Pasobra sin Dios ta imposibel pa mantene bo famia riba e caminda corecto.
No tin ganashi, ni tampoco triunfo den maldad, no paga malo cu malo, traicion cu traicion, tampoco odio cu odio, pero laga amor ta e vehiculo cu ta trece paz den cada hogar.
Cada infieldad,divorcio, of cada separacion, cada mayor iresponsabel cu no ta cria su yiu ( 1 Timoteo capitulo 5 vers 8) ta duna un señal di descurashamento y sin nos nota ta produci un kiebro den e muchanan su conducta y caracter.
Awendia ora bo bay coregi un mucha, bo ta bin tende hopi historia tristo , y bo ta puntra bo mes, cu por tin hende asina iresponsabel ta cana rond traha yiu diferente caminda y cu no ta cria ningun, kende nan no kier pa muchanan papia cu otro, y tin mucha cu conoce otro, pero nan no sa cu ta ruman nan ta.
Pesey Bijbel ta bisa bo cu no tin paz pa malbadonan, pasobra hopi ta kere cu malbado ta solamente e atracador, matador, violador, abusador eseynan so ta malbado, no esey no ta berdad, tin hopi malbado scondi mey mey di nos cu no kier para responsabel pa nan yuinan.
Nan ta culpabel, pa cada mucha cu cay den mal caminda,pasobra nan tin di corda cu e yuinan no ta di nan, pero cada mucha ta di Dios, y Dios lo yama nan pa duna cuenta.
Tin hopi tin cu tin di arepenti, y pidi Dios misericordia pa nan biba , sali for di e cuna di orguyo y arogancia y pone pia abao na suela, y hisa cara wak na cielo, y pidi pordon pa hechonan cu nan a comete sea den ignorancia, of emocional, pa asina yega na paz cu Dios.
Awe dia sociedad ta permiti hende broma den nan maldad, y gaba nan mes.
Salmo 34:14 ta bisa: Aparta bo mes for di maldad y haci bon, busca pas y siguie.