Dia pa dia mundo ta yenando cu Falsedad, hende falso y imitacion di tur cos, cosnan berdadero ta duro pa encontra, hende firme cu ta mantene nan bista riba Señor ta birando menos.
Si nos wak rond di nos hopi hende ta buscando pa nan mes, y ta lubida riba nan prohimo, hopi ta papia di Dios, pero nan interes no ta den cos nan di Dios, nan kier usa pa nan propio beneficio. Pero un cos nos tin di corda cu Dios ta Santo, Puro y Berdadero y ningun hende por haci bofon di Dios.
Hudas Iscariot esun cu a traiciona Hesus a cana cu Hesus, siña for di Hesus, drumi lanta hunto cu Hesus, pero su curason no tabata cu Hesus. Hende por bisa, cu e traicion mester a tuma lugar manera a wordo profetisa, pero e traicion di Hudas, ta tipifica e caracter di hende awendia.
Ta asina cu hopi ta sera horea pa e berdad, y ta loco pa scucha y biba cu mentira, sera wowo pa desencia, y respet y acepta tur clase di inmoralidad cual ta falsedad contra Dios.
Tur locual ta contrario na e palabra di Dios ta falso, pasobra tur locual ta falso ta un mentira, y a wordo produci door di un mentiroso.
Hopi biaha nos ta mira con e pañanan cu ta imitacion di marcanan caro, ta wordo kima na monton pasobra , nan ta stroba benta di esnan berdadero, asina tambe lo pasa cu hendenan cu ta bisa cu nan boca cu nan ta stima Dios pero nan curason ta leu for di Dios.
Den Mateo capitulo 13 Hesus ta duna un splicacion tocante e maishi y e yerba shimaron, cu nan ta parce otro, y nan ta crece hunto, y e ta bisa cu na final e Angelnan lo bini y nan lo recohe tur e yerba shimaron y tira nan den forno di candela, hunto cu tur piedra di trompica y tur esnan cu ta haci inikidad.
Nos no tey pa mustra dede riba otro, pasobra nos tur a peca , pero Dios den su inmenso amor a manda su yiu Cristo Hesus pa tur esnan cu kere den dje no bay perdi , ma ricibi bida eterna. Esey ta nifica cu tur hende tin e oportunidad di bira berdadero sirbido di Dios y stop di biba un bida di imitacion.
Yui chikitonan no laga ningun hende gaña, esun cu ta praktika husticia ta husto, mescos cu E ta husto. Esun cu ta praktika pica ta di diabel, pasobra diabel a haci pica for di principio. E Yiu di Dios a parece pa e proposito aki, pa destrui e obranan di e diabel.( 1 Juan 3:7+8).
Dios kier pa nos ta fiel y berdadero, pasobra si nos ta bisa Señor, Señor y nos no ta kere y obedece Señor,nos ta bira parti di imitacion y e berdad no ta den nos.
Pa esnan cu ta puro, tur cos ta puro, ma pa esnan cu ta contamina, y cu ta incredulo, nada no ta puro, ma tanto nan como nan consenshi ta contamina. Nan ta profesa cu nan conose Dios, ma cu nan hechonan nan ta nenga Dios.pasobra nan ta abominabel y desobedecido , y nan no ta sirbi pa nada bon.( Tito 1:15+16).
Esun cu ta bisa mi conoc’E y no ta warda su mandamentonan ta un gañado, y e berdad no ta den dje.( 1 Juan 2:4).
E pueblo aki ta honra Mi cu nan lipnan, ma nan curason ta leu for di mi.( Mateo 15:8).
1 comment
[…] Source link […]