Laga nos habri nos dia cu oracion, pasobra oracion ta nifica comunicacion cu Dios, ta Dios mes ta manda nos haci oracion, pa asina Dios, scucha y habri portannan den nos bida, saca nos for di tur clase di problema, provee pa tur sorto di necesidad, cura nos di tur sorto di malesa, aleha e malbado for di nos bida, cuida nos famia, fortifica nos matrimonio,y mas cu tur cos duna nos e paz y trankilidad cu nos mester.
Hende grandi ta bisa cu oracion a vence bruheria, y esey ta berdad, pasobra caminda oracion ta wodo haci cu Fe, bruheria tin cu disparce, pasobra e presencia di Dios, ta corre cu e diabel, e presencia di Dios ta basha tur altar di bruheria abao, paga tur bela, y libra hende for di e mundo di scuridad, y trece nan na e lus di Dios.
Un bida sin oracion ta un bida bashi, sin direccion, oracion mester wordo haci por lo menos tres biaha pa dia, pasobra nos ta ricibi rosea di Señor henter dia, y pakico nos no por ora tres biaha pa dia pa gradici Señor pa su bondad.
Caminda hende no ta haci oracion, orguyo ta lanta, inmoralidad ta halsa cabes, desicion robes ta wordo tuma, capricho, cabesura y duresa di curason, ta wordo mira como alternativa, pasobra no tin comunicacionm cu Dios.
Ta tristo cu nos por tende hende ta reuni pa tuma decision importante pa nos pais, pero nunca nos ta tende cu nan ta reuni prome den oracion, yama Dios danki, y pidi Dios su guia pa nan por haci lo miho pa e pais por bay dilanti, pasobra caminda tin oracion Dios ta manda Su sabiduria.
Y den oracion no tin asunto di mayoria, ta Dios su boluntad ta prevalece, y plan di hende ta wordo cancela.
Den Mateo 7:7-8 ta para scirbi: Pidi y lo wordo duna na boso, busca y boso lo haña, bati y lo wordo habri pa boso. Pasobra ken cu pidi lo ricibi, y ken cu busca ta haña, y pa esun cu bati lo wordo habri.
Den Mateo 18:19 ta para scirbi: Atrobe mi ta bisa boso, cu si riba tera dos di boso bay di acuerdo tocante cualkier cos cu nan pidi, esaki lo wordo haci pa nan door di mi Tata cu ta den cielo. Pasobra caminda dos of tres reuni den mi nomber, ey mi ta mey mey di nan.
Oracion cu nos ta haci mester wordo haci cu Fe y pa duna Gloria na Dios na prome lugar.
Pa medio di oracion:
Elias a baha candela for di cielo.( 1 Reynan 18:36-38).
Eliseo a haci oracion y Dios a ciega henter un ehercito Sirio.(2 Reynan 6:12-18).
Isiaias 37:14-36.Rey Ezequias a haci oracion na Dios pa defensa di su pais, pasobra su ehercito tabata debilita, kibra y cu hamber, y Dios a sali na nan defensa y manda un Angel destrui 185 mil soldat Sirio den un anochi.( tene cuenta cu e oracion aki a wordo haci pa un solo homber).
Hechonan 16:25 Pablo y Silas tabata sera encadena y sepa, y nan tabata haci oracion y canta himno di Alabansa na Dios, y diripiente a bini un temblor fuerte y fundeshi di e prison a sacudi, portanan a habri y cadenanan di nan a los.
Te tempo pa nos haci oracion directo na Dios.( Santiago 4:2-3).
Oracion cu Confiansa ( 1 Juan 5: 14-15).
Oracion constantemente.( 1 Thesalonisensenan 5:17).
Tur ora cu nos mester haci oracion den nomber di Cristo Hesus, E lo scucha nos.( 1 Juan 3;22).