Si bo no ta kere cu fierno ta existi, lo bo realisa esey ora cu ta laat caba.
Ta para scirbi den 1 Thesalonisensenan 4: 7+8 : Pasobra Dios no a yama nos pa ta impuro, ma pa hiba un bida santo.
Pesey esun cu rechasa esaki, no ta hende e ta rechasa, sino e Dios cu ta duna su Spirito Santo na boso.
Ma si un hende no tin e Spirito di Cristo e no ta pertenece na dj’E.( Romanos 8:9).
No sea sabi den bo mes bista, teme Señor y aparta bo mes for di maldad. ( Proverbionan 3:7).
Pesey somete boso na Dios, Resisti diabel y e lo huy for di boso. Hala serca Dios y E lo hala serca boso. Limpia boso mannan , boso pecadornan y purifica boso curason, boso di curason dobbel.( Santiago 4:7+8).
Sea sobrio, sea alerta. Boso adversario, e diabel, ta cana rond manera un leon cu ta gruña buscando ken e por devora.(1 Pedro 5:8).
Pasobra e wowonan di Señor ta riba e hustunan, y Su horeanan ta atento pa scucha nan oracion,ma e cara di Señor ta contra esnan cu ta haci malo.( 1 Pedro 3:12).
E cooperacion y apoyo cu hende ta duna na maldad y inmoralidad awendia ta increibel, ta parce cu hende a lubida cu ta imposibel pa gaña Dios, cu Dios no ta laga ningun hende haci bofon di Dios, tur locual hende a sembra esaki tambe nan lo cosecha.( Galationan 6:7).
Nos ta bibando riba un mundo, caminda hende ta pensa cu tur cos por y cu palabra, principio y standarte di Dios ta wordo rechasa.
Un bida completamente den libertinahe, caminda respet pa mayor, autoridad, y tur locual ta palabra di Dios, no ta conta, pero bagamunderia, sensualidad y perversion, ta keda aproba.
Rond mundo autoridad di mayor riba yiu ta corre peliger, ya cu leynan cu muchanan por haci hopi cos sin aprobacion di mayor ta drentando na vigor.
Y den tur esaki nos ta mira presencia di e maligno, e adversario cu ta buscando di tur forma pa destrui e hubentud, matrimonio y famia, y ta pesey nos ta adverti pa tur hende busca Cristo Hesus y aparta for di maldad.
Nos ta bibando den tempo trabahoso, cu antes nos tabata pensa cu e lo no yega, pero awor nos ta bibando den dje, un tempo den cual placa tin mas balor cu hende, y cu hende kier sa cu placa por reemplasa Dios.
Un tempo di cual hende kier cambia nan naturalesa den cual nan a wordo forma den barica di nan mama, y asina para e multiplicacion di ser humano, faltando respet na Dios y su statutonan.
Y tur esaki ta obra di diabel, pasobra diabel kier lanta hende contra Dios, pasobra e sa cu e no tin entrada serca Dios, awel e ta purba di hala mas tanto hende posibel pa fierno.
Den Lucas 16:19-31 tur hende por comproba existencia di fierno y cielo, y tambe tur hende por sa cu esun cu drenta fierno no por sali mas y esun cu drenta cielo no por sali mas, y cu no ta existi ningun contacto entre cielo y fierno nan dos ta separa.
Pero tambe tin un gran berdad cu si un hende muri sin Cristo nada mas no por wordo haci pe, pasobra ora nos ta na bida nos mester acepta Cristo Hesus y biba pa Cristo Hesus, pa asina ora nos muri nos ta bay serca Cristo kende a prepara lugar pa nos.