Pastor Marcel Balootje: No tene duele di bo mes, hisa bo cara y wak riba senjor

Tur dia no ta mesun dia, y no tur dia ta mesun cos, tin un dia facil y un dia duro.

Tur hende por pasa den dificultad di bida, tur hende por haci un fout, pero nos no ta obliga di keda pega den e situacion, pasobra Dios ta capas pa saca nos for di tur situacion dificil.

Dios por permiti nos pasa den tempo duro pa asina nos por haña:

Confiansa den Dios, reconoce cu Dios ta Todopoderoso.

Fortalece nos karakter, y forma nos pa e proposito di Dios den nos bida.

No solamente esaki, ma nos ta regosiha tambe den nos tribulacionnan, sabiendo cu tribulacion ta produci perserverancia, y perserverancia , karakter,y karakter , speransa,y speransa no ta despunta, pasobra e amor di Dios a wordo drama den nos curason door di Spirito Santo, kende a wordo duna na nos.( Romanonan 5:3-5).

No cu mi a alcansa esaki caba, of cu mi a bira perfecto caba,ma mi ta haci tur esfuerso, pa mi por gara e loke pa locual ami tambe a wordo gara door di Cristo Hesus. Rumanan mi no ta pretende cu mi mes a gare caba, ma un cos mi ta haci, lubidando loke ta keda tras, y aspirando na loke ta dilanti.Mi ta haci tur esfuerso pa alcansa e meta, pa haña e premio celestial di Dios den Cristo Hesus.( Filipensenan 3:12-13-14).

Tur hende cu kier biba den bo pasado, of kier usa bo pasado como un kruk pa tene bo abao, please corre bay leu for di nan, pasobra nan no tin lugar den presente, ni tampoco den bo futuro.

Tene na cuenta lo siguiente; Kende ta pordona tur bo inikidatnan ( Salmo 103:3) esaki ta nifica cu una bes nos confesa nos pica ( 1 Juan 1:9) Dios ta fiel y husto di pordona nos. nos picanan.

Pesey si un persona ta den Cristo, ta un criatura nobo e ta, e cosnan bieu a pasa caba, ata tur cos a  bira nobo.( 2 Corintionan 5:17).

Ora nos ta bisa pa un hende no tene duele di su mes , pero mantene su bista riba Cristo Hesus, esey ta nifica cu ningun hende of situacion , no tin mas poder cu Dios den bo bida.

Pasobra hopi biaha, hende por wordo intimida, door di e sistema di mundo, door di politiek,door di inmoralidad, especialmente ora bo kier sali for di un bida cu no ta agrada Dios.

Arepentimento y pordon di pica, tin un forsa sobrenatural cu ningun diabel di fierno, no por contra dje.

E poder di confesion, ta haci hende liber, ta kibra cadena, ta corre cu bruheria, ta basha murayanan abao, y ta derota tur falta di pordon cu ta pone hende cana bao di depresion y sinti duele di nan mes.

Hopi hende no sa cu ora bo tin duele di bo mes, di foutnan di pasado, of oportunidad perdi, of un curason cu no kier pordona, bo salud mental ta corre peliger, y bo mester di ayudo, y sigur bo mester di e presencia di Cristo Hesus den bo bida urgentemente.

E cosnan aki Mi a papia cu boso, pa den Mi boso por tin pas. Den mundo boso tin tribulacion, ma tene curashi Mi a vence mundo.( Juan 16:33).

Regosiha semper. Haci oracion sin stop,sea agradecido den tur cos, pasobra esaki ta e boluntad di Dios pa boso den Cristo Hesus.( 1Thesalonisensenan 5:16-18).

Pasobra E a libra nos di e poder di scuridad y a traslada nos pa e reino di Su Yui stima.(Colosensenan 1;13).