E verso “ No tene Miedo” ta aparace 365 biaha den Bijbel esey ta un recordatorio pa nos tur dia, riba locual Dios a bisa. Hesus tabata bisa continuamente na su disipelnan no tene miedo, pasobra miedo no ta bini di Dios. Dios no ta duna ningun hende un spirito di miedo.
Nos ta bibando den tempo trabahoso, caminda e spirito di miedo cual ta diabel en persona kier manifesta tur caminda, mundialmente e ta drentando den e grado di mas halto di nacionnan atacando gobernante y mandatario , pesey e palabra di Dios ta bisa nos pa nos haci oracion pa tur gobernante y esnan cu ta dirigi e pais.( 1 Timoteo 2:1-7).
Tin un pensamento di miedo ta bay rond ,cu ta pone hende ta complace cu maldad y inmoralidad.
Pero e Palabra di Dios ta bisa den Galationan 6:10 : Pasobra ta fabor di hende mi ta busca awor of di Dios? Of ta hende mi ta trata di agrada? Si ainda ta hende mi ta trata di agrada lo mi no tabata un sirbido di Dios.
Tambe tin un otro manera cu miedo ta domina, cu ta pone cu nos ta imita locual otro ta haci , pensando cu si mi no hacie mi ta keda atras, y kico nan lo pensa dimi?
Ta tempo pa nos bira serio cu Dios y no wak kico hende ta pensa di nos pero tene bon cuenta con nos ta para den bista di Dios.
Un mayor por complace cu su yiu semper y cuando su complacencia, no ta contra boluntad di Dios, ni tampoco contra ley, pasobra en bes di bendiciona su yui e ta bira un piedra di trompica.
Si tabatin un tempo cu nos tur mester para firme den nos fe, ta awor , pasobra esquadron di maldad ta bahando riba e mundo aki pasobra satanas sa cu su tempo ta cortico, y cu Cristo Hesus ta na caminda.( Lucas 21:8-19).
Miedo ta pone hende ta perde confiansa y duda ta drenta den nan curason y asina hiba nan na depresion.
Pero palabra di Dios ta bisa lo siguiente:
No tene miedo, pasobra Mi ta cu bo, no desmaya pasobra Mi ta bo Dios,lo Mi fortalesebo,si lo Mi yudabo, si lo Mi sostenebo cu Mi man drechi di husticia. ( Isaias 41:10).
Pasobra Ami ta Señor bo Dios kende ta sostene bo man drechi, Kende ta bisabo ‘No tene miedo lo Mi yuda bo.(Isaias 41:13).
Nos confiansa den Dios ta nos defensa, nos fe den Dios ta nos fortalesa, pasobra aunke nos no ta mira Dios, Dios ta berdadero y Dios ta Fiel.
Nos crecemento ta bini door di nos confiansa den Dios, ora nos por demostra cu nos por entrega tur cos den Man di Dios, y keda firme pasobra pa Dios nada ta Imposibel.
Maske mi cana den e vaye di sombra di morto, mi no tin miedo di maldad pasobra Abo ta cu mi, Bo bara, y Bo garoti ta consolami.( Salmo 23:4)
Nos tin di busca cara di Dios constantemente den Oracion, pa asina Dios mustra nos pa no permiti ningun hende ni tampoco e diabel manipula nos bida, laga nos corda , y esaki ta especialmente pa nos hubentud, pa no complace cu hende y keda perhudica.
Por ehempel si bo tin un yiu cu un hende no ta garantia cu e ta keda cu bo. Tene bon cuenta cu esey.
Si un hende kier bay, laga e bay, pasobra Dios tin algo mihor pa bo,nos no ta yama pa biba den pica y depresion, pero nos ta yama pa biba den Bendicion.
