Tin hopi hende ta biba keriendo cu nan por haci locual cu nan kier, y Dios tin di compronde,
Ricibiendo aviso y conseho,lesando y mirando den e direccion cu nan bida ta bay y toch no kier tende.
Hopi biaha nos ta pensa cu ta hende cu tin poco educacion , pero ta hendenan sabi ta purba ignora Dios y sigi den nan pensamento y actonan cu ta hiba na nan destruccion si nan no arepenti.
Den Romanonan 2:5 -9 ta para scirbi: Ma pa motibo di bo capricho y curason cu no ta arepenti bo ta montona furia pa bo mes den e dia di furia y revelacion di e huicio husto di Dios.
Kende lo paga cada ken segun su obranan.Lo tin tribulacion y angustia pa cada alma di hende cu ta haci maldad.
Nada no ta scondi for di bista di Dios, bo no por biba trahando bo mes ley, y sirbi Dios manera bo kier, pensando cu Dios tin di acepta bo inmoralidad y bagamunderia como custumber di karakter y cultura.
Pasobra Dios no ta haci wega, y pensando hopi biaha cu repercusion no ta bin di inmediato, hende ta avansa den maldad y no ta respeta Dios. Pesey e palabra di Dios ta bisa cu bo ta montona furia pa bo mes, y e momento cu bo no pensa e furia lo alcansa bo.
Den Mateo 23:25-28 Hesus ta duna nos un explicacion hopi cla di esaki bisando:
Ay di boso escriba y fariseonan, hipocritanan! Pasobra boso ta limpia e parti pafo di e copa y di tayo, ma paden ta yen di ladronicia y pasionnan descontrola.
Nos tin di tene cuenta hopi bon con nos ta biba y kico nos ta haci pa nos no gaña nos mes, pasobra Dios si ningun hende no por gaña, ey nan si hende ta dal nan dede duro, pasobra dilanti di hende nos por hunga comedia, pero dilanti di Dios tur cos ta sunu.
Abo fariseo siego , limpia prome e parti paden di copa y tayo, y e ora ey e parti pafo tambe por bira limpi. Nos mester entrega nos curason prome na Cristo Hesus y e lus di Cristo mes lo cambia nos apariencia dilanti di hende,pasobra Dios ta wak nos curason y no e luho cu nos ta biba den dje.
Pasobra boso ta manera tumbanan blancha cu di pafo ta mustra bunita, ma di paden nan ta yen di weso di hende morto y di tur tipo di sushedad.
Hopi biaha hende na mustra bunita, cu ta parce manera nan bon cu tur hende, pero e curason ta yen di odio, vengansa y persecucion. Dios kier pone nos na altura cu tur e cosnan eynan ta habri den su bista.
Asina boso tambe di pafo ta parce husto na hende, ma di paden boso ta yen di hipocrecia y inikidad.
Dios ta hala nos atencion, di no hunga wise, arepenti, cambia bida y biba manera Dios kier.
Tin dos historia den beibel cu tur hende mester lesa cual ta Leviticonan 10:2 y Hechonan 5: 1-11.
Pero esaki ta locual Señor kier pa nos tur haci:
Bendiciona ta e hende cu ta confia den Señor y kende su confiansa ta den Señor, Pasobra lo e ta manera un palo, planta canto di awa, y cu lo no tin miedo ora calor bini, ma su blachinan lo ta berde, y den aña di secura e no ta preocupa. ( Jeremias 17:7+8).
Confia den Señor y haci loke ta bon,biba den e tera y alimenta bo mes cu Su fieldad.( Salmo 37:3).
