Pastor Marcel Balootje: No entrega, sigi perservera, dios ta cu nos

Nunca maldad por vence bondad, nunca mentira por vence berdad, loke Dios tin pa bo como hende, ta pa abo e ta. 

!!! Tene pasenshi y lo bo mira Dios su bondad pa bo bida, no envidia ni tampoco desea cos di otro hende.

!!! Bo no tin mester di destrui bida di hende pa bo haña locual cu nan tin, pasobra esey no ta boluntad di Dios.

*** Bendicion di Dios, ta bin pa bo sin ningun problema hunto cune, basta bo sa di perservera , y di confia Dios, pasobra diamanta bo no ta haña riba tera, y oro no ta puro si e no bay candela, asina ta pa tur cos bon den bida nos mester perservera.

Tur cos haña riba custia di otro hende lo bo no gosa di dje, cosnan haña pa medio di traicion y complot, no ta duradero, nan ta bini cu perdemento di soño anochi y cu preocupacion durante di dia, pesey ta bon pa spera riba Dios, y Dios lo duna e deseo di bo curason.

No pone trampa pa ningun hende , pero busca Dios di henter bo curazon, Dios sa locual ta mihor , pa bo, no tin amistad mas dushi y perfecto cu esun cu bo tin cu Dios, pasobra den Dios, nos confiansa ta real , y nos Fe ta crece dia tras dia.

Cada paso cu bo ta dal confia Dios, y no cana scucha aki y aya, buscando conseho di mundo, pa bo bida, pero haci Señor e prioridad di bo bida, duna Cristo Hesus e prome lugar den bo curason, y tur hende lo mira con bo ta crece, y con bo ta logra, y nan lo sa pa medio di e frutanan cu Dios ta duna bo, cu berdaderamente Dios ta cubo.

Sea agradecido tur momento, pone tur bo plannan den Su man, y no confia riba man di hende, pasobra hende por lubida, hende por tarda, hende por ninga, y hasta hende por traiciona, pero Den Cristo Hesus nos tin un Baranca fuerte, un fuente di bendicion y un cas di sosiego.

Ta cosnan grandi Señor ta haci pa esnan cu ta confia y perservera, pasobra nan lo mira Su gloria, pasobra pa Señor no ta existi tempo malo, ni tampoco escases.

Señor ta grandi y Todopoderso, y no ta nenga ningun cos bon na esnan cu ta confia den dj’E.

Tene cuenta cu tera por sacudi, laman por lanta, pero Dios tin poder riba tur cos, pesey no tene miedo, ni tampoco perde confiansa, pero mantene bo bista riba Dios, pasobra tur bendicion,tur don, y tur talento, y no lubida tur cos bon ta bini di nos Tata Todopoderoso.

Tur dia no ta mesun dia, y tur dia no ta mesun cos, pero tur dia ta di Dios.

Aunke nos ta mira cu mundo ta yena cu mentira, y cu hende ta rechasa Dios, pa haña cosnan temporal di e mundo aki. 

Nos ta sigi perservera pa mira Dios su bondad, pasobra ningun hende cu a pone nan confiansa den Dios a keda berguensa . Dios su tempo ta perfecto, y su yudansa semper a alegra curason di hende.

Laga nos curasha nos hobennan pa sigi den caminda di Dios, pasobra tin hopi caminda ta mustra bunita, y ta caba den maldad, pero solamente den e caminda di Dios tin sabiduria y pas.

Tin hopi tentacion diabolico pa bida di e hoben, pero e hoben cu stima Dios, lo para duro, y crece y lo ta mas cu vencedor den Cristo Hesus.

Nunca entrega pero sigi perservera.