1 Corintionan 15:33 ta bisa: Mal compania ta daña bon custumber.
Den e tempo cu nos ta bibando, nos oracion mester ta constant, pa asina evita cu maldad, ta drenta nos curason , nos cas y nos famia.
Nos mester keda vigila y ta wowo habri pa nos no participa den ningun clase di maldad, pasobra tin biaha algo chikito por tin consecuencia grandi, si nos no ta alerta.
Pa cuminsa mester tene cuenta masha bon cu kico nos ta desea, y locual nos ta papia,, tin hopi di bisa den locual nos ta cosecha.
Ta dificil pa desea malo constantemente pa otro y pensa cu bon mester bin pa bo, sabi cu bo pensamento no ta cuadra cu boluntad di Dios, pasobra Dios ta conoce cada intento di nos pensamento, pesey nos kier spiertabo, pa no consenti, ni tampoco asocia cu maldad.
Hopi biaha hende ta parce inocente, pero nan ta e motor di maldad, pa haci daño na otro, asina ta tira piedra sconde man , dunando cooperacion pa maldad tuma lugar.
Mundo no a cambia, ta hende a cambia, influencia door di maldad, perdiendo respet den tur cos, rebeldia contra tur locual ta bon, y mas cu tur cos alehando for di Dios.
Salmo 1:10 ta bisa: Mi yiu si pecadornan tenta bo no consenti.
Nos ta yama como reconciliador, nos no ta yama como pegador di candela.
Nos ta yama pa trece pas y no pa trece pleito y violencia.
Pesey nos mester tene cuenta cu cada conseho cu ta sali for di nos boca, cada conseho mester ta yena cu e palabra di Dios, pa duna crecemento na esun cu mester di dje.
Nos ta bibando den un tempo cu Hubentud mester di conseho.
Matrimonionan mester di conseho.
Famia mester di conseho, pero nos ta den e tempo cu tin conseheronan diabolico ta cana rond cu no tin temor di Dios, cu ta pone yiu contra mayor, y esposo contra esposo, pasobra nan no conoce e Berdad y ta haci tur cos riba propio forsa.
Tene cuenta cu cada biaha cu nos bay contra palabra di Dios, nos a drenta un guera cu ta imposibel pa gana, pasobra esun cu bo ta bringa contra dje ta Todopoderoso.
Nos mester rechasa , mentira y odio, calumnia,orguyo, inmoralidad , y no smile, of like sabiendo masha bon cu e cosnan ey no ta bon, y no ta agrada Dios.
Ora hende ta apoya maldad, poco poco bo ta drenta den e caminda di malbado, y pa tristo cu por parce, bo por ta sabi, pero bo ta mustra bobo, ora bo ta bay contra Dios y su Palabra.
Romanos capitulo 16:17+18 ta bisa: Mi ta roga boso, rumannan , tene na bista esnan cu ta causa division y strobacion, contrario na e siñansa cu boso a haña y aparta boso for di nan.
Pasobra sorto di hendenan asina ta esclabo , no di nos Señor Hesus Cristo , ma di nan mes apetit,y cu nan palabranan suave y agradabel nan ta gaña curazon di inocentenan.
Poverbionan 4:14 ta bisa: No pasa riba e bereha di malbadonan, y no subi e caminda di hombernan malbado.
Proverbionan 24:1 ta bisa: No sea envidioso di hende malbado, ni desea di ta hunto cu nan, pasobra nan curason ta planta violencia, y nan lipnan ta papia calamidad.
No ta tur cos cu nos tende hende papia mester ripiti,of like, of share, pasobra awendia maldad ta move den papel di regalo.
