Hopi biaha nos ta lesa den beibel tocante cu Adam a peca, pero si bo lesa bon y compromde e colebra nunca a papia cu Adam , e colebra a aserca Eva y Eva a come di e fruta y ofrece na Adam cu tambe a come y complace cu Eva, y desobedece Dios..
Pa e motibo aki Adam a perde su autoridad, pasobra den Genesis Capitulo 1 vers 27, Dios a duna Adam y Eva tur autoridad bisando :Laga nan goberna riba e pisca nan di laman y riba parhanan di cielo, riba bestia nan di cria riba henter e tera, y riba tur bestia cu ta lastra riba tera.
Adam tabatin tur autoridad riba e astucia di e colebra , pasobra Dios a duna nan autoridad riba bestia,Genesis Capitulo 2:6 ta confirma cu Adam tabata presente ora e colebra tabata papia cu Eva y no a husa su autoridad, tampoco responsabilidad ,pesey tur falta a cay riba Adam.
Cu esaki nos kier splica cu ora bo ta na altura di algo malo, of bo ta mira algo malo ta tuma lugar, y bo no ta stop e cos, ni tampoco bo ta haci denuncia, esey ta haci bo complice y asina bo a entrega bo autoridad y bo responsabilidad como mayor.
Mayor tin autoridad y responsabilidad pa instrui orden y respet .
Dios den su misericordia y amor a manda su unico yiu Cristo Hesus pa ken cu kere den dje ( Juan 3 vers 16-19 ) no bay perdi.
Pero tambe den 2 Corintionan capitulo 5 vers 19 Dios a reconcilia e mundo cu Su mes sin tuma nos picanan na cuenta, asina un persona nobo den Cristo su integridad, autoridad, y responsabilidad a wordo restaura pa medio di Cristo Hesus cu Dios.
Colosensenan 3 vers 18 te cu 21 ta duna e diseño di Dios pa Matrimonio y Famia:
Esposanan sea sumiso na boso esposonan manera ta pas den Señor.
Esposonan stima boso esposanan y no sea amarga contra nan
Yuinan sea obedecido na boso mayornan den tur cos, pasobra esaki ta agradadel na Señor.
Tatanan no provoca boso yuinan pa nan no perde animo.
Esaki ta Dios su deseo pa tur Matrimonio y Famia.
Pero tambe tin algo masha importante, cu tur mayor mester bisa nan yiunan esey ta Philipensenan 4 vers 9 cu ta bisa:
E cosnan cu boso a siña y ricibi y a tende y a mira den mi , practica e cosnan aki, y e Dios di paz lo ta cu boso.
Mayornan mester uni pa instrui, coregi , y ta un bon ehempel pa boso yiunan, pa nan por imita boso den bondad.
Mescos cu un tata por disiplina su yiu, asina Dios tambe ta disiplina nos, disiplina di mayor ta pa un tempo cortico segun nos comportacion, pero disiplina di Dios ta pa semper , pa asina nos por comparti den Su Santidad.( Hebreonan 12 v 9+10).
Ora inmoralidad drenta den un cas, autoridad y responsabilidad ta cay den man di e enemigo, esey ta sosode pa causa di pica, hende ta pensa cu maldad ta keda secreto, y ta kere cu ningun hende no sa, pero Dios ta odia impuresa y inmoralidad , y Dios lo saca tur cos na cla, Dios no ta coopera cu maldad.
Maske con dificil y trabahoso e tempo ta , mantene bo Fe firme den Cristo Hesus, y no entrega bo autoridad ni tampoco bo responsabilidad como mayor.