1 Corintionan capitulo 11 vers 3 ta bisa; Ma mi kier pa boso compronde cu Cristo ta cabes di tur homber, y e homber ta cabes di e muher, y Dios ta cabes di Cristo.
Pesey tur homber cu ta cabes di cas mester soru (zorg) pa tur locual cu nan ta haci ta cay bao di cobertura y aprobacion di Cristo. ( Cristo no ta aproba infieldad, maltrato di esposa y yuinan).
Huntu cu Dios , tata y mama ta goberna e cas den boluntad di Dios, pesey e palabra di Dios ta bisa pa nos instrui nos yuinan for di chiki den e caminda di Dios, pa nos lanta nan den e disiplina y instruccion di Señor..
Ora nos ta balora palabra di Dios, nos lo mira su gracia y su bendicion den nos bida. Pero ora nos rechasa palabra di Dios, nos lo mira con dolor y tristesa ta afecta nos bida.
Nos yuinan ta nos responsabilidad cu Dios a duna nos, nan ta un regalo di Dios cu Dios a duna nos pa cuida pa semper.
Ora bo hiba bo yiu creche, school, kinderopvang etc, bo reponsabiliad ta keda mesun cos. y segun bo yiu ta crece bo ta keda responsabel, pa e mucha ta na cas y no ta cana riba caya, tin ora di corre hunga cu amigonan, y tin ora di bin paden.
Si e mucha tin un bais ( baiskel) ta corre cu bo mes a cumpra pe, abo como mayor ta dicidi cu despues di 6:30 pm bo yiu no por ta riba un bais sin lus ta corre riba caya caminda auto ta trafica, y cu abo no sa den cual caya e ta.
Pasobra awor aki a bira un sistema di sconde y bisa, awel hopi di muchanan cu ta den problema no tin tata na cas, antes tabatin otro excuus, cu ta bisa tur dos e mayornan ta traha.
Si nos sigi modernisa,nos sistema di cria yiu, den cual nos comunicacion cu e mucha casi no ta existi, nos situacion lo sigi empeora, pasobra enbes cu e mayor tuma su responsabilidad na serio, cada dia ta bini mas excuus, y caminda tin hopi excuus, diabel ta drenta.
Pasobra no lubida cu ora Dios a reclama Adam tocante su pica Adam a bisa Dios ta e muher cu Bo a dunami y Eva a tira falta riba e colebra, y asina nos ta mira dicon awendia hende ta huy pa nan responsabilidad.
Tur locual un mayor cumpra pa su yiu, e mester ta mara na un condicion cu si e mayor ripara cu desobedencia ta aumenta, e tin di kita e cos ey for di dje, sea ta bais, telefon, tablet etc, pasobra mayor tey pa pone ordo, no pa excuus, pasobra riba tur instancia cu ta para riba derechi di mucha, e mayor ta responsabel dilanti di Dios pa su yiu y dilanti di tur autoridad.
Tin hopi dama ta mama soltera door di cabayero iresponsabel, pero tin mama soltera ( Mayor di edad) cu ta pensa cu mi no tin mester di e tata, mi kier ta liber, pasobra mi tin un bon trabao, mi ta gana bon placa, mi mes por cria mi yiu, pero corda bon cu materialismo no por reemplasa amor di tata.
Pakico no tuma tempo y forma un famia, cu tur responsabilidad manera e Palabra di Dios ta bisa?.
Tur mayor ta responsabel pa nan yiu, dilanti di Dios, y di hende.
