Pastor Marcel Balootje: Mayor bo tin autoridad riba bo yui

E autoridad cu un mayor tin riba su yiu ta bini di Dios, pasobra e yui cu bo tin ta Dios a duna bo e.

Awendia a lanta un cos nobo cu diferente grupo ta bisa cu muchanan ta di nan, pero no cu bon intencion, pero cu intencion di daña e muchanan, su bida, hasta gruponan inmoral y diabolico, a lanta cu kier cambia identificacion di muchanan , y hala muchanan for di tempran den caminda di scuridad.

Un mayor tin tur autoridad riba su yiu pasobra ta door di dje e mucha ta na mundo.

Tin un palabra cu hende grandi ta usa bisando: Esun cu nunca no a pari , no conoce dolor di mama.

Un mucha tin mester di su mayornan, y e mayornan mester di e mucha dje, e mayor tin un deber sagrado di percura pa bienestar , fisico, social y spiritual di e mucha.

Semper un mucha mester biba den e forsa cu su mayornan ta permiti, nunca un mucha no por ta biba for di forsa di su mayornan, cu ideanan grandi cu su mayornan no por cumpli cune.

Ta mayor su deber di splica su yiu, kico e por alcansa, y siña e mucha con ta usa placa conscientemente for di chiki, pa e sa kico ta cumbini y kico no ta cumbini.

Nos ta bibando den un tempo cu e sistema di mundo, ta hambra pa kita e autoridad di mayor for di riba e mucha, door di bini cu leynan, cual ta duna e mucha autoridad riba su curpa y cu e mayor no por dicidi pa e mucha, leynan cu a sali for di fondo di fierno, leynan cu cada dia ta causa division den famia.

Nos tur tin cu corda cu tur locual ta causa division ta bini di diabel,pasobra pa medio di division e kier cohe bentaha den bida di hende, cas y famia.

Corda riba esnan cu a guia boso, cu a papia e palabra di Dios cu boso,y considerando e resultado di nan conducta, imita nan fe. Hesus Cristo ta mescos ayera awe y pa semper.( Hebreonan 13:7).

Yuinan sea obedecido na boso mayornan den tur cos,pasobra esaki ta agradabel na Señor. ( Colosensenan 3:20)

Mi yiu tende e instrucccion di bo tata, y no bandona e siñansa di bo mama. Pasobra nan lo ta un bunita adorno pa bo cabes, y coyar na bo garganta.( Proverbionan 1:8-9),

Obedencia ta oro, y comparabel cu diamanta y piedra precioso, pero desobedencia ta bin di scuridad y ta hole manera webo putri, un holor cu ta dificil pa sconde.

Nos no mester lubida cu bida di un mayor ta un testimonio y un guia pa su yiu, locual e mucha mira su mayornan haci esey ta prome cos cu e ta copia, pasobra e mentor original di un mucha ta su mayornan.

Ora un mucha ta habri su boca y bisa ni mi mama no tin nada di bisami, esey ta nifica cu tin algo no ta bay bon na cas.

Ora despues ora yega e momento cu e mucha ta bisa cu ningun hende no tin nada di bisami, esey ta nifica cu e enemigo a tuma control di su mente, pasobra autoridad di mayor a laga di desea.

Autoridad di mayor tey pa guia e mucha riba bon caminda, pa coregi, pa disiplina, pa produci bon cuidadano, pa mantene integridad, norma , balor y respet na halto den bida di e mucha.

Scuridad ta loer tur momento riba bida di nos muchanan, y awor mas cu nunca scuridad ta aumenta.

( 1 Pedro;5:8).