Pastor Marcel Balootje: Maske con grandi e necesidad ta, laga honestidad prevalece

Un balansa engañoso ta abominacion pa Señor, ma un peso husto ta Su delicia.(Proverbionan 11:1).

Peso falso ta un abominacion pa Señor, y un balansa engañoso no ta bon.( Proverbionan 20:23).

Pesey, prome cu tur cos, mi ta exhorta, pa suplika, oracion, peticion y gradicimento wordo haci pa tur hende. pa reinan y tur esnan cu ta den autoridad, pa nos hiba un bida trankil y keto den tur santidad y dignidad. Esaki ta bon y aceptabel den bista di Dios nos Salbador. ( 1 Timoteo 2:1-3).

No preocupa pa nada,ma den tur cos, pa medio di oracion,y suplica cu gradicimento, laga boso peticionnan ta conoci dilanti di Dios, Y e pas di Dios, cu ta surpasa tur comprondemento, lo warda boso curason y mente den Cristo Hesus.( Filipensenan 4:6-7).

No haci nada cu actitud di egoismo,of orguyo,ma cu humildad, laga cada un di boso, considera e otro mas importante cu e mes: no busca boso interes personal so, ma busca tambe interes di otronan.Laga tin den boso e actitud cu tabatin tambe den Cristo Hesus.( Filipensenan 2:3-5).

Den tempo cu nos ta bibando aki, sea necesidad ta wordo mira, of necesidad ta wordo sinti, no ta tur hende su potmoni, ta alcansa pa pone cuminda riba mesa den nan hogar, preisnan ta cambia di mainta pa atardi, y di anochi pa mainta.

Ta un tempo cu hende mester tene cuidao, pa mantene bo mes decente, teniendo bo testimonio na halto, mantene e integridad cu solamente Dios por duna hende, no integridad falso, pero sea hende drechi tanto den scuridad como den claridad.

Tur hende ta pasa den necesidad, un mas cu otro, pero no laga bo necesidad pone bo peca, no laga hende usa bo, tampoco laga hende abusa di bo, no bende bo mes, para firme,cana firme y biba firme.

Pasobra nos tin cu corda e palabra di Dios cu ta bisa: Y mi Dios lo provee tur loke boso tin mester, segun su rikesa den Gloria den Cristo Hesus.( Filipensenan 4:19).

Mantene boso wowo habri pasobra tin hende cu di berdad tin curason pa yuda, pero semper tin probechador ta sluip drenta den cas di hende, guia door di diabel pa haci daño y mantene hende den  inmoralidad y hopi scuridad.

Pan haña cu engaño ta dushi pa un hende, ma despues su boca lo ta yen di greis.( Proverbionan 20:17).

Señor lo no permiti pa e husto pasa hamber, ma deseo di e malbado e ta tira un banda.(Proverbionan 10:3).

Si nos tin cuminda y paña pa bisti, cu esakinan nos mester keda contento. Ma esnan cu kier bira rico ta cay den tentacion, y den trampa, y den hopi deseonan loco y dañino, cualnan ta hundi hende den ruina y destruccion. Pasobra amor pa placa, ta reis di tur sorto di maldad, y algun hende door di esaki, a desvia for di fe, y a traspasa nan mes cu hopi dolor.( 1 Timoteo 6:9+10).

Hobennan por favor boso tur ta mira con awor a para bira cu diariamente, cargamento di droga ta wordo intercepta, diariamente hende ta wordo sera.

Awor a keda na boso, pa rechasa e bida destructivo, cu den bista di hopi ta parce bida facil awendia, door di cana rond cu un tas chikito cologa den bo banda, bendiendo droga, ya asina cooopera cu satanas pa destruccion di otro y na final causa bo propio destruccion. 

Mihor un hende pober cu ta cana den su integridad, cu un hende cu tin boca perverso y ta bobo tambe. ( Proverbionan 19:1).