Esaki ta con ta pa nos tur, pasobra nos mester kere den Dios y no duda, pa asina nos ricibi di Dios.
Pero si bo ta haci bo peticion na Dios for di un stoel materialista, keriendo cu bo posicion mundano cu bo tin ta haci influencia riba Dios bo ta mal ekiboca, bo ta hopi lew for di cas, bo no ta bay ricibi nada, pasobra bo ta un persona di doble animo.( Santiago Capitulo 1 vers 8).
Dios ta bisa den su Palabra pa nos tur compronde ( 2 Cronicas 7 Vers 14+15) :Y si Mi pueblo cu ta wordo yama na Mi nomber humiya nan mes, esey ta pa nos compronde cu tur peticion mester sali for di un curazon humilde, sin orguyo, arogancia, pensando cu mi ta mas cu mi prohimo y cu Dios tin di atende ami prome.
Dios no ta den e tipo di asuntonan ey, si un hende tin derechi di haña algo y abo tume, sabiendo cu ta pa otro hende e ta , djis pasobra e a wordo facilita na bo persona, nos tin cu bisabo cu esey no ta bendicion, esey ta malicia y corupcion, esey ta falta di integridad, pasobra bo sa masha bon cu esey no tabata destina pa bo y lo bo no disfruta di dje.(Salmo 37 vers 7).
Awor ora un hende pidi Dios algo, e mester tin Fe y siña warda pasobra Dios sa e momento exacto cual e ta bay duna bo e peticion y Dios nunca ta yega laat.
Bo no por sinta riba stoel di bofonado y cherchado y kere cu Dios ta bay yudabo, siña pordona prome, pasobra bo actitud y manera di pensa no ta agrada Dios. Stoel di vengansa no ta ofrece ningun speransa.
Ora un hende kier ayudo di Dios e mester asocia cu hende humilde, pasobra Dios ta aprecia hende humilde, y Dios ta yuda hende humilde di curazon ( Romanonan Capitulo 12 v 16-21).
Den Mateo capitulo 8 vers 5-13 e Centurion a tende di Hesus y a reconoce cu e milagernan cu Hesus ta haci ta bini di Dios.
Tambe e a reconoce e poder di e palabra di Dios, pesey e a bise cu e no ta digno pa Hesus drenta bao di su dak, y esey ta afirma humildad, pasobra asina Dios ta concede nos peticion( 1Juan Capitulo 5 vers 14-15) ora nos kere den Su poder..
E tambe tabata un homber cu autoridad pero e a reconoce cu tin un autoridad mas halto cune.
Pasobra si nos ta pidi Dios algo y nos no ta reconoce cu e ta Todopoderoso, esey ta demostra falta di confiansa y falta di Fe y Respet.
Ta segun bo kere personalmente, lo bo ricibi, pasobra tur peticion ta personal, bo no por drumi laga hende pidi pa bo, y kere lo bo ricibi algo , hende no por ta floho pa haci oracion pa nan mes.
Tur mayor mester por haci oracion pa nan mes y pa nan yuinan, si no ta asina ta con abo como mayor cu Dios a duna e encargo di bo hogar ta comunica cu Dios?
Si abo como mayor haci oracion cu Fe , y pidi Dios pa aleha bo yiu completamente for di Droga, Arma, y Geng , lo bo ricibi manera bo a kere.
Pero si bo ta bishita cas di bruheria, y bo ta haci cherche di Dios , lo bo no ricibi nada.
