Un di e cosnan di mas balor cu por tin y cu e sistema di mundo, ta neglisha ta respet, y hopi biaha nos kier trata cu e symptoma y nos no kier bay na e sistema.
Ta parce manera, Bon dia, Bon tardi, Bon nochi, despensa, por fabor, warda riba nos beurt, respeta hende grandi y mucha, tur a bay den baul di antaño.
Nos ta lubida cu respet ta fundeshi di nos educacion.
Hopi error den bida di hende ta bini pa falta di respet, respet ta algo cu mester wordo sembra den tur hende for di chikito, y no solamente sembra, pero cultiva, mantene, preserva tur momento pasobra respet ta un prenda hopi valioso, cu hopi biaha ora nos perde, ta costa tempo pa recobra e respet bek.
Cuanto hende falta di respet no a costa nan , nan libertad, tin di nan hasta a perde nan bida.
Respet ta bini di Dios, y nos ta mira cu semper diabel ta pusha hende pa falta respet, den tur cos.
Un hende cu no tin respet ni pa su mes ni pa otronan ta socialmente ciego.
Den e asunto di mayor y yiu e diabel ta pusha hobennan pa no respeta tampoco honra nan mayornan y asina causa friccion den famia.
Den asunto di matrimonio, ora tin asunto di adulterio y violencia relacional ta un falta di respet na bo esposa/esposo y na Dios.( Genesis 2:22-25).
Tur caminda cu tin falta di respet, tin falta di amor y tambe demasiado orguyo den curason di hende..
Nos ta debe Reverencia, Honra, y Gloria, na Señor riba tur ser humano.
E mundo ta desea pa wordo adora, pero nos debe nos adoracion solamente na Dios Tata Todopoderoso,
Su Yiu Cristo Hesus , y Spirito Santo.
Bo no por maltrata un hende pa asina e respeta bo , pasobra tin hopi hende ta pensa cu bo mester maltrata un muher pa e respeta bo of bo tin di maltrata( Bati) bo yuinan pa nan respeta bo.
Pero e realidad di bida ta cu bo ta pone hende respeta bo cu bo actitud, bo manera di stima y trata ta pone hende respeta bo, e palabra di Dios ta bisa no haci cu hende locual bo no kier pa nan haci cu bo. .
Si bo ta namora di un mucha muher/ homber y for di awor bo ta mira cu no tin respet.
Bo por purba na drecha e asunto y si bo ta mira for di awor cu no tin respet, para e asunto ey.
Pasobra auto, trabao, bon tipo,placa,y propiedad, no tin mas balor cu respet pa bo persona.
Si for di awor e ta hisa man pa bo, con lo haci ora boso ta boso so den un cas.
Abo no por cambia hende, ta solamente Dios por cambia hende.
Pa falta di respet hopi hende a perde trabao y bon oportunidad.
Pa falta di respet hopi matrimonio cu a cuminsa bunita a termina na divorcio.
Pa falta di respet hopi hoben no a logra caba scol.
Respet ta asina importante den bida , pasobra caminda tin hende drechi, respet ta wordo exigi, pero caminda tin bagamunderia y inmoralidad tur tipo di falta di respet ta wordo acepta.
Ora no tin respet den un cas, e presencia di Dios y su Spirito Santo no tey.
Ta dificil pa alaba Dios cu un boca sushi yen di palabra malo.
Corda bon cu falta di respet tambe por wordo demostra door di movecion di nos curpa y bistimento.
Un bida di di respet ta un bida cu ta agrada Dios, pasobra respet, puresa y santidad ta cana hunto y si nos tene cuenta cu tur hende cu a aserca Hesus a aserca Hesus cu respet.( Marco 5:22-24).
