Respet ta algo masha bunita, respet ta mustra cu nos tin bon educacion, respet ta demostra cu nos ta bini for di un bon famia, caminda for di chikito , orden y disiplina a wordo sembra den nos bida.
Respet ta bini di Dios, pasobra nos Dios ta un Dios di orden, di decencia, Kende ta guia tur cos den un forma amistoso y di pas.( 1 Corintionan 16:14).
Falta di respet , ta causa berguensa, e ta manera un buraco habri den nos karakter, cu hopi biaha ta manda mal holo, especialmente ora e ta combina cu palabra malo, y actitud indecente.
Hopi ta kere cu un boca sushi, y arogancia ta cos di broma cune, al contrario e ta decadencia personal.
Hasta tin hende ta bisa “ No busca mi boca” manera ta un cos masha bunita, ora un hende ta papia palabra malo, sin worry den presencia di ken of na unda e ta.
Falta di respet, combina cu palabra malo, ta baha balor di hende, no ta importa den cual idioma bo expresa, e ta djis demostra un falta di educacion.
Awor esaki a bira un trend pa e asina yama “influencers” cu den programma di tv of riba facebook hopi biaha ta duna un comportacion vulgar y cu lastimamente nos hubentud ta imita.
Pero hopi di nan no sa cu den e bida real di e persona ey no ta comporta asina , pero pa hala atencion den su show, e ta bisa algun palabra, pa mantene su fanaticada.
Den nos bida di tur dia, nos ta mester respeta otro tur momento, respet ta cuminsa na cas, sigi hibe scol of trabao, tur caminda cu nos ta, respet mester prevalece, pasobra respet ta ordo di bida, un persona respetabel, tur caminda lo wordo respeta, y porta lo ta habri pe tur momento, tur caminda.
Pero ora un hende ta indentifica su mes cu falta di respet for di momento cu e ta bini di leu, hende ta cuminsa prepara pa ricibie, y pa haci combersacion cortico cune, pa asina evita cualkier barbaridad.
Respet tambe ta algo hopi serio den nos forma di bisti, pasobra hopi biaha, especialmente serca hende muher, bo forma di bisti tin hopi di haber cu bo karakter, y e respet pa bo mes.
Tambe ta hopi notabel e asunto di Tattoo , si nos tuma nota un Tattoo no ta algo barata, tin Tattoo ta costa miles di florin, awor ora un hende gasta un cantidad di placa asina , e tin di demostra locual cu e a pone na su curpa, awor e pregunta ta bini:
Un hende mester sigi bisti paña cortico, lomba afo, of cu menos paña na su pecho, pa asina demostra su Tattoo pa resto di su bida? Laga nos pensa e esaki pa un momento y evita di laga diabel gaña nos.
Ora mayornan ta duna ehempel di respet den cas, nan ta crea un ambiente di respet pa nan yuinan, pasobra ora no tin respet den un cas , e presencia di Dios no tey, pasobra e Spirito Santo di Dios, no tey caminda tin bochincha y desorden, discusion y violencia.
Pesey e palabra di Dios ta bisa: No haci nada cu actitud di egoismo,of orguyo,ma cu humildad, laga cada un di boso, considera e otro, mas importante cu e mes.
Falta di respet hopi biaha ta bini di orguyo den nos bida, cual ta pone hende pensa cu nan ta mas cu otro, y Dios no ta di acuerdo cu esey. ( Colosensenan 3:25).