E boluntad di Dios pa nos bida semper mester ta na prome lugar, pa asina nos lo tin exito den tur locual cu nos ta haci.
No sea conforme e mundo aki, ma sea transforma pa medio di e renobamento di boso mente, pa boso por comproba kico ta e bon y agradabel y perfecto boluntad di Dios.( Romanonan 12:2)
Pa nos cana den boluntad di Dios ,
E ta exigi sinceridad di nos banda,
E ta exigi fieldad di nos banda
E ta exigi obedencia di nos banda,
E ta exigi un gran respet, y reconoce cu E ta Señor y doño riba tur cos.
Sea keto y sabi cu Ami ta Dios, lo mi wordo halsa meymey di e nacionnan , lo mi wordo halsa riba tera. ( Salmo 46:10).
Confia den Señor cu henter bo curason, y no depende riba bo mes comprendemento.Den tur bo camindanan reconoce Dios,y E lo dirigi bo berehanan.( Pasonan).( Proverbionan 3:5-6).
Mas sincero nos ta cu Dios, mas confiansa nos tin den Dios, mas habri nos curason ta pa Dios, mas limpi nos bida ta den su presencia, y mas e por husa nos pa Su honor y gloria.
Nos sinceridad y nos fe ta pone Dios crea un cura di proteccion rond di nos pasobra Señor sa ken ta esnan cu berdaderamente ta di dj’E y e ta broma cu nan.( Job 1:8).
Caminda tin sinceridad, no tin orguyo, tampoco rebeldia,pasobra Dios ta goberna e curason , cu na tur momento ta dispuesto pa sirbi.
Pesey nos mester haci lo siguiente: Somete nos mes na Dios, resisti e diabel y e lo huy bay for di boso. Hala serca Dios y E lo hala serca boso. Limpia boso mannan boso pecadornan, y purifica boso curason, boso di curason dobbel.( Santiago 4:7-8),
Esey ta pasonan cu mester wordo tuma den nos bida, pa nos yega na un curason sincero dilanti di Dios y hende , cual ta un testimonio bibo cu nos ta sirbidornan di Dios.
Sinceridad no por wordo copia, ni tampoco imita, pasobra asina cu nos sinceridad no ta firme y berdadero, e ta comberti su mes den falsedad y mentira, y e ta stroba un comunicacion cu Dios.
E enemigo no ta gusta hende sincero, pasobra nan ta proclama e grandesa di Dios, den cual tur hende ta mira y sa cu Dios ta soberano, y cu nos tur mester entrega nos bida na Cristo Hesus.
No worry cu pa motibo di bo sinceridad, bo amistad wordo rechasa, pasobra mundo ta yen di maldad, malicia , inmoralidad, caminda mentira ta wordo acepta y berdad ta wordo critica.
Como cu den obedencia na e berdad, boso a purifica boso alma,pa un amor sincero pa cu e rumannan , stima otro fervientemente di curason. ( 1 Pedro 1:22).
Bendiciona ta e mayornan cu ta sincero cu nan yuinan, y cu ta guia nan den caminda di berdad, pa asina nan lanta cu e berdad di Dios den nan bida, pasobra un mayor sincero, cu conoce e berdad, mester sa cu ta imposibel cu su yiu por ta sincero sin conoce Cristo Hesus.
Cristo ta e caminda, E berdad y E bida, ningun hende por yega serca e Tata si no ta pa medio di dj’E.
Den Cristo nos ta ricibi sinceridad, honestidad, y integridad, locual e mundo kier imita, pero e no por ofrece, ya cu e mundo no tin e berdad di Dios.
Laga nos ta sincero y hala mas y mas serca Dios, E ta warda nos cu brasa habri.