Pastor Marcel Balootje: Laga nos prepara den oracion, tempo duro ta na caminda

Den Lucas 21 : 33 Hesus ta bisa cielo y tera lo pasa ma Mi palabra lo no pasa.

Mirando locual ta pasando mundialmente, con e palabra di Dios ta cumpliendo, nos por pidi tur hende pa haci oracion y mas cu tur cos pa nan tin Cristo Hesus na prome lugar den nan bida.

Cosnan ta cambiando di un forma cu hende no ta comprende, enbes di nos bay dilanti nos ta bay hopi atras moralmente, ya tur sorto di maldad ta tuma lugar abiertamente, y laga nos no spanta cu ainda falta mas bagamunderia pa tuma lugar.

Ya no ta tempo mas pa abo ni bo famia sali cas mainta sin haci oracion, y purba tambe di tin oracion tur anochi hunto cu bo famia na cas.

Ta biniendo un gran decepcion den locual ta educacion cu mucha ta hanja na cas y enseñansa cu e ta hanja na scol, pasobra nan a cuminsa contradeci otro den hopi pais aki na mundo, y e ta biniendo den nos direccion..

Na Hulanda mucha nan for di chikito apenas 9 aña ta haña les tocante sexualidad di hende di mesun sexo, cual ta causando hopi drama den famia.

Pasobra muchanan ta bini for di scol y puntra mayor kico ta sex, y mayor ta splicanan cu sex ta bini door di amor entre un homber y un muher y e mucha ta contesta, cu esey no ta locual e maestra a splica, pasobra maestra a splica cu tur sorto di sex por tuma lugar. 

Esey ta nifica cu muchanan ta wordo doctrina den inmoralidad for di chikito.

Ta cambionan grandi ta tumando lugar riba e mundo aki pa asina e ministerio di inikidad por manifesta na su antoho,(2 Thesalonisensenan 2:1-12) pasobra diariamente maldad ta wordo aproba, y inmoralidad ta creciendo.

Pesey e bida di oracion ta importante pa henter nos famia.

Nos por spera mas temblor, manera a pasa na Turkia y Syria , pasobra e ta para scirbi.(Mateo 24:7).

E palabra di Dios ta sinja nos cu inikidad lo aumenta grandemente, y amor di hende lo fria y esun cu perservera te na fin , esey lo ta salba.(Mateo 24:11-13).

Inikidad lo aumenta , pasobra hende a bira mas stimado di nan mes cu stimado di Dios, hende lo apoya maldad mas cu bondad, y mas cu tur cos hende ta chercha Dios y enbes di respeta Dios ta haci politica cu locual ta sagrado.

Den e tempo cu nos ta biba aki ta facil pa hende wordo distrai y desvia for di caminda di Dios, pasobra hopi ta wak cosnan temporal cu e mundo ta ofrece, y lubida locual ta eterno.

Nos tin di prepara nos mes, pasobra nos ta bay wordo persigi pa motibo di e nomber di Hesus Cristo, pa motibo di para firme pa Su palabra, pasobra hopi lo trompicay lo entrega otro.

E sistema di mundo kier kita e autoridad di mayor for di riba e yui, y asina aproba libertinahe, cu tur consecuencia cu e por tin, pasobra ora mayor no por coregi nan yui, esey lo trece gran division den famia . 

Den un palabra bisa , destrui e nucleo familiar cual ta e plan di e diabel, pasobra e a bini pa horta , mata y destrui.( Juan 10:10).

Ma sea alerta tur ora bay,haciendo oracion pa boso por tin forsa y scapa di tur e cosnan aki cu ta bay tuma lugar y pa para dilanti di e Yiu di hende ( Lucas 21:36)

Solamente arepentimento, misericordia y compasion di Dios lo por yuda nos scapa di maldad cu ta na caminda.