Tene cuenta cu bo ambicion (locual bo kier logra den bida ) por hiba bo na pica, maldad y inmoralidad. Un persona a yega di puntra kico ta inmoralidad?
Inmoralidad ta tur locual ta bay contra Dios su Principio, Palabra y Su boluntad, y cu ta desvia hende y aleha nan for di Dios.
Pasobra nos tin di corda cu Moralidad ta referi na tur locual ta bon y decente (Filipensenan 4:8+9).
Den esaki nos ambicion, por aleha nos for di Dios, pesey nos tin cu tene bon cuenta cu nos ambicion, y si nos ripara cu e ta hala nos for di e caminda di Dios, nos mester dicidi cual caminda nos ta sigi.
Mateo 6:24 ta bisa: Ningun hende no por sirbi dos shon, pasobra e lo a odia esun y stima e otro, of lo e ta leal na esun y despresia e otro. Boso no por sirbi Dios y rikesa.
Ta dificil drenta den un cueba di colebra venenoso, y bisa cu bo ta bay cambia nan, pasobra e chens di contagia y bira venenoso ta hopi grandi pa bo mes, pasobra bo afiliacion ta cambia bo ambicion.
Nos ta conseha tur hoben, si bo no kier wordo conta den esnan cu ta haci malo, wak bon cu ken bo ta cana, bao di cual palo of skina di caya bo ta sinta.
Ademas si bo kier bay dilanti den bida cana cu hende sabi (especialmente den e Palabra di Dios, pasobra awendia tin hopi sabiduria diabolico).( Santiago 3:13-18)
No lubida e palabra di Dios ta bisa: Mal compania ta daña bon custumber.( 1 Corintionan 15:33).
Si bo ta busca fabor di hende bo no por sirbi Dios, pasobra hopi biaha hende den nan trayectoria pa busca fabor di otro hende , tin di disfama otro, trapa riba otro, rebaha otro, desgaba otro.
Esey no ta bini di Dios. Pasobra bo no ta ricibi fabor di Dios kibrando bo prohimo.
Y den bo ambicion pa busca cos di mundo bo ta nenga Cristo. ( Galationan 6:10).
Segun un hende su ambicion, tur cos lo sali na cla, si e ta stima mundo of e ta stima Dios.
Pasobra 1 Juan 2;15 ta bisa: No stima mundo ni e cosnan cu tin den mundo. Si un hende ta stima mundo, e amor di e Tata no ta den dje.
Pasobra locual cu tin den mundo , e deseo di carni, y e deseo di wowo,y e orguyo di bida, no ta bin di e Tata, sino di e mundo.
E palabra aki ta duna nos disernimiento pa descurbri locual ta diablura, y locual ta bini di Dios.
Esaki ta e palabranan cu ta dirigi nos na e ambicion cu Dios kier pa nos tin:
Filipensenan 2 :4 ta bisa : No busca boso interes personal so, ma busca tambe interes di otronan.
1 Corintionan 10:24 ta bisa: No laga ningun busca su mes interes, sino esun di su prohimo.
Romanonan 15:1 ta bisa; Awor nos cu ta fuerte mester soporta e debilidadnan di esnan cu ta sin forsa,y no djis agrada nos mes.
Laga nos evita di sirbi nos propio interes:
No haci nada cu actitud di egoismo of orguyo, ma cu humildad laga cada un di boso, considera e otro mas importante cu e mes.( Filipensenan 2:3).
Pasobra ken cu ta halsa su mes lo wordo humiya, y esun cu humiya su mes lo wordo halsa.( Lucas 14:11).
Nos ambicion pa cosnan di mundo, sea posicion of rikesa ta aparta nos for di Dios.No gaña boso mes .( Galationan 6:7).