E ta zona manera un cos di hari, y ta un palabra cu ta move den boca di pueblo, pero e ta un tristesa pa bo tende hende bisa ,y kere cu awendia tur cos ta placa.
Cu placa tin poder riba hende.
Cu hende ta bende nan mes pa placa.
Hende ta lubida riba nan famia pa placa.
Hende ta cay den inmoralidad pa placa.
Hende ta sconde maldad pa placa.
Hende ta prefera acepta corupcion pa placa.
Hende ta sera wowo y boca pa placa.
Hende ta tolera, acepta y apoya maldad y inmoralidad pa placa y hende ta ninga Dios pa placa.
Tur hende sa pero poco hende kier bisa e cos manera e ta, pasobra e berdad no por wordo scondi y ta tempo tur hende corda, y bolbe corda y no bisa despues mi no tabata sa, pero di acuerdo cu e palabra di Dios: Tur hende cu ta rechasa of neglisha e palabra di Dios lo bay fierno.
Fierno no ta un lugar cu Dios a traha pa hende, pero un lugar cu Dios traha pa satanas y su demoñonan. Pero hende door di scohe e caminda hancho cual ta hiba na perdicion, y a rechasa of neglisha e caminda di Dios ta bay resulta den fierno.
Ningun hende ta bay fierno pa motibo di pica y inmoralidad, pasobra si nos confesa nos pica Dios ta fiel y husto pa pordona, nos, nos picanan y libra nos di inhustia.
Hende ta bay fierno pasobra nan a rechasa e plan di salbacion di Dios ( Juan 3:16-18) y (Juan 3:36).
Nos tur mester di Cristo Hesus, den nos bida, e palabra di Dios mes ta siña nos esey, cu Cristo ta nos refugio y nos speransa, nos Señor y nos Salbador, y cu ningun hende no por yega serca e Tata sino ta pa medio di su yiu Cristo Hesus, pasobra solamente E ta e mediador entre Dios y hende.
Awor e asunto di haci wega cu Dios, menciona su nomber, hunga religioso, y no kere den Dios, y laga Dios afo di nos asuntonan, no ta drenta den presencia di Dios, pasobra e palabra ta bisa nos hopi cla den 2 Timoteo 2:19 : Sinembargo, e fundeshi firme di Dios ta para ,seya cu e inscripcion aki: Señor conoce esnan cu ta di dje, y laga tur esnan cu ta menciona e nomber di Señor abstene di maldad.
Tin un caminda cu ta parce bon den bista di hende, ma su fin ta e caminda di morto.( Proverbionan 14:12).
Hendenan sabi ta wordo engaña, y nan ta gaña hende, pasobra nan no a kere den e Yiu unigenito di Dios, pasobra tur hende ta puntra ta con por ta posibel cu hende sabi, por ta hiba un lucha di inmoralidad y falta di respet y temor pa Dios, y ta busca tur manera pa rechasa y neglisha e palabra di Dios.
Si muchanan chikito, cu no tin conocemento,haci algo robes, hende grandi cu tin conocemento mester coregi nan , pero ora hende cu conoce e berdad, pa falta di respet y temor di Dios, ta haci bofon di Dios, pa asina nan complace cu maldad, pa logra nan deseo carnal anto e ora ey e furia di Dios lo baha riba hende desobediente .(Romanonan 2:4-5).
Pasobra nos conoce Esun cu ta bisa: Ta di Mi vengansa ta.Ami lo paga bek, y atrobe Señor lo huzga Su pueblo, ta un cos teribel pa cay den man di E Dios bibo.
