A yega tempo pa tur hende sa cu integridad ta bini di Dios, y cu integridad no por sostene maldad.
Integridad no solamente ta nifica haci bon, hasta ora hende no ta mira bo, pero e ta nifica na prome lugar un curason cu ta pertenece na Dios.
Integridad no ta nifica haci cos pa hende mira, pa hende bisa bo ta integro, pero integridad ta nifica agrada Dios.
Hende cu curason dobbel, cu ta haci cos pa complace hende, y cu ta pone Dios un banda pa agrada cu maldad conscientemente , no tin conocemento kico ta integridad.
Hose den buki di Genesis 39:7-12 ta demostra integridad, bon karakter y un bida di respet, demostrando cu e no ta peca contra Dios, ni tampoco abusa di confiansa di hende.
Daniel den e buki di Daniel capitulo 6 ta demostra integridad y temor di Dios,pasobra di ningun forma e no a acepta idolatria den su bida.
Un hende integro no por ta mara na ningun clase di idolatria,pasobra idolatria, ta compara cu golosidad, y ta hiba na scuridad y bruheria.
Job e demostra integridad den su bida, na momento cu e a perde tur cos , toch e no a murmura contra Dios, hasta su esposa a bise : Ainda bo ta mantene bo integridad? Maldiciona Dios y muri ( Job 2-9+10).
Hende di dobbel animo, of di curason dobbel, hende cu ta duda den Dios,cual e palabra di Dios ta bisa cu un hende asina no por spera di ricibi algo di Señor , siendo un hende di curason dobbel, inconstante den tur su camindanan.Un persona asina no ta integro, pasobra su confiansa den Dios no ta firme.Bo no por defini na cual banda e ta para.( Santiago 1:7-8).
Esun cu ta cana den rektitud ( integridad) ta cana confiadamente,ma esun cu ta perverti su camindanan lo wordo descubri.(Proverbionan 10:9).
Si bo tin amigo of amiga cu ta pone bo cana den caminda di inmoralidad, tuma nos conseho y kibra cu e amistad ey, los for di e atadura ey, sali lihe pasobra bo integridad ta na peliger, y bo karakter ta debilitando.Laga hende bisa bo ta cobarde of mal amigo, pero laga bo bida ta agradabel den bista di Dios, pasobra pronto lo yega e dia cu nos tur lo tin di duna cuenta na Dios. ( Romanonan 14:12).
Hende ta chansa cu pica, y ta broma den caya di inmoralidad, pensando cu nan por haci bofon di Dios, apoyando locual ta malo, y resistiendo contra locual ta bon.
Laga integridad y rectitud wardami, pasobra mi ta spera riba Bo.( Salmo 25:21).
Integridad di e rectonan lo guia nan, ma perversidad di e traidornan lo destrui nan.(Proverbionan 11:3).
Ora nos ta integro nos ta un modelo di cual hende por wak riba dje, no ta importa cu nos no ta rico, of tin hopi propiedad, pasobra mihor un esclavo integro cu un biyonario inmoral.
Integridad di mayor ta masha importante pa nan yuinan, pasobra nan ta yama como role model di famia, esnan cu mester duna ehempel di firmesa y amor den cas,esnan cu no por corre bay laga nan responsabilidad.Ta riba nan e yuinan tin cu wak , pa asina nan por cana drechi den bida, y a sabi di respeta otro, pa awe nan yuinan por respeta nan.
Ta dificil pa un hende ta integro bibando den pica of apoyando pica conscientemente.
Ta tempo pa arepenti y entrega bo bida na Cristo Hesus, y ricibi integridad, pasobra integridad ta bini di Dios.( 2 Corintionan 5:17).