Honesto y sincero no mester ta solamente un pretencion, pero un realidad, pasobra Dios ta stima hende cu ta honesto y sincero, cu nan mes, nan prohimo, y tambe cu Dios.
Palabra di Dios ta bisa cu esun cu ta sconde su pica lo no prospera, pasobra di berdad ningun hende no por sconde pa Dios, pero locual Dios kier ta pa nos ta sincero y confesa locual cu nos a haci, aunke e ta contra nos, pasobra confesando nos ta kibra e gara di diabel for di nos bida.
Ora nos confesa na Dios, diabel no tin ningun caminda mas pa acusa nos dilanti di Dios.
Sinceridad ta haci nos puro, sin ta mescla cu nada negativo, sin presencia di un curason dobbel den nos bida.Sinceridad ta drecha nos comunicacion cu Dios y cu hende, pasobra mas sincero nos ta, mas bon comprondemento tin entre nos y nos prohimo.
Ora nos no ta sincero, nos ta bira hende cu no tin palabra, inconfiabel, pa no usa e palabra mentiroso, of hende cu ta tarda pa papia e berdad, pero no laga nos lubida cu Dios ta demanda di nos pa nos ta sincero, especialmente den nos matrimonio, nos cas y nos famia.
Ta for di chiki un mucha mester siña di ta sincero cu su mayornan, y asina papia tur cos tanto locual cu ta bon, of locual cu ta menos bon.
Tur hende mester ta sincero, pero mas ainda un hende cu ta traha un trabao huramenta , ta wordo spera di di un persona asina dobbel sinceridad.
Un soldaat cu no ta sincero ta pone henter un batayon bay perdi.
Dios ta yama nos pa nos ta sincero:
Laga amor ta sin hipocrecia. Aborece loke ta malo,tene firme na loke ta bon.Stima otro cu amor fraternal,duna preferencia na otro den honor.( Romanonan 12:9-10).
Pesey poniendo mentira un banda,cada uno di boso , papia berdad cu su prohimo, pasobra nos ta miembro di otro.( Efesionan 4:25).
Ta tempo pa tur hende realisa cu prome cu tin un palabra riba nos lenga ya Señor sa di dje caba y cu ningun hende no por gaña Dios , ni tampoco haci bofon di Dios.
Ora mayornan no ta sincero cu nan yuinan, muchanan ta wordo traumatisa, pasobra den nan curason nan ta kere cu mami y papi ta stima otro, pero ta hopi tempo caba cu sinceridad no ta existi entre nan mayornan y ora divorcio cay aden muchanan ta keda di shock ora e famia dividi.
Hopi hende grandi no ta realisa esaki , of no kier realisa, cu pa motibo di nan falta di sinceridad, awe nan yiu ta riba mal caminda, y nan ta culpa e mucha di rebeldia, pero nan ta lubida nan falta di sinceridad un na otro, cual ta perhudica henter un famia.
Den tur liderazgo mester existi sinceridad, hasta den politica mester tin sinceridad, sino e pais lo bira lomba pa Dios, pasobra e boluntad di Dios lo no wordo respeta, pasobra no tin sinceridad.
Di mesun manera exhorta e hombernan hoben pa nan ta huicioso: den tur cos presenta bo mes,como un ehempel den bon obra, cu puresa den doktrina, cu dignidad.(2 Tito 2:7).
E plan di diabel ta pa descurasha e hubentud den tur forma, pa nan ta hende sin identificacion, sin balor di bida, cu no ta sincero, cu no ta aprecia cos nan di Dios, sin temor di Dios, rebelde, sin aprecio pa nan mayornan.
Pesey nos como mayor, mester lanta e bandera di sinceridad y honestidad, pa asina dirigi e hobennan riba caminda di Dios.