Esey ta e mihor conseho cu mester sali for di boca di cada mayor pa nan yiu, Proverbionan 4 :23 ta bisa asina dunando sabiduria supremo: Warda bo curazon riba tur cos, pasobra e ta Fuente di bida. Kita for di bo un boca engañoso y tene lipnan perverso lew for di bo.
Mira bon na unda bo pianan ta hiba bo, e ora ey tur bo camindanan lo keda estableci.
No bira ni na man drechi , ni na man robes , tene bo pia lew for di maldad.
No cana den caminda di hende malvado.
Hopi biaha nos ta mira cu muchanan ta falta informacion di mayor, nan ta yen di experiencia di computer y television, hopi informacion di internet, y di revista pero poco informacion di nan propio mayor.
Y esaki ta resulta cu nan no por confronta bida, pasobra en bes di pone nan bista riba cos bon, nan ta wak cos malo y atende cu hende robes.
Un hende grandi cu ta instrui un mucha den un caminda robes, ta un malbado, pasobra e sa masha bon cu su palabra ta dañino pa e mucha y no ta contribui na e futuro cu e mucha mester.
Hoben por favor scucha di bo mayor, asina un hende ta priminti algo , of guiabo na algo cu ta for di boluntad di Dios, e persona no ta respetabo, no ta respeta bo mayor, ni tampoco tin respet pa Dios.
Ora un persona ke eherce un dominio riba bo, cu droga of alcohol of sex , aleha di e persona ey.
Ora cu un hende kier ofrecebo placa a cambio di sex , tene na cuenta cu e ta mirabo como un prostituta, of instrumento di placer temporal, of e mes ta un prostituta cu kier mantene bo den su gara.
Ta tempo pa tur hoben sa cu no ta tur locual ta briya ta oro, y cu djente blanco no ta curazon, esey ta nifica cu no ta tur hende cu ta hari cu bo kier bo bon, ta imposibel pa un hende por guia bo den MALDAD y e kier bo bon.
Un hende cu ta siña bo pa falta respet pa bo mayornan, kier destrui bo futuro, pasobra e kier kibra bo relacion cu Dios, un hende asina su IQ ta hopi halto den maldad.
Si bo tin un amigo of amiga cu no ta interesa pa sera conoci cu bo mayornan, tene bon cuenta, pasobra su interes den bo ta solamente pa placer of financiero.
Awendia tin hopi hende ta aparenta como hende cu conoce Dios , pero nan curazon ta yen di idolatria, warda bo mes for di tipo di hende asina.( 2Tim 3 vers 1-5)
Un hoben ta wordo reconoce door di e respet cu e ta duna na otro, palabra malo, violencia y mal comportacion no por indetificabo ora bo kier bay dilanti den bida.
No wak kico e malbado tin y desea mesun cos ,no kere den poder di hende pasobra e ta temporal,ni tampoco confia ora hende ta bisa constantemente cu un otro persona ta mal hende, pero purba di sa pa bo mes.
Confia den Señor cu henter bo curazon y no depende riba bo mes comprondemento, den tur bo camindanan reconoce Dios y e lo dirigi bo pasonan.
