Mas cu 60% di mundo ta participa den e actividad di Halloween, e ta un negoshi grandi pero semper e pregunta ta surgi:
Pakico mester tin un cas di mal spirito? Pakico mester disfrasa na morto? Pakico mester tin obheto di horror presente? Pakico durante e temporada ey bruhonan ta reuni?
Y mas cu tur cos na ken e fiesta aki ta dedica?
Como mayor tene cuenta cu hopi mucha ta bay e tipo di fiesta ey y bin cas malo, hopi ta wordo intoxica cu alcohol y droga, y hopi ta wordo spanta, abusa y viola pero como nan ta den fiesta e miedo ta wordo domina, pero despues e ta manifesta den mal soño, berdad ta sali na cla, y e consecuencia ta pa e mayor.
Nos no tin nada di haber cu morto,tampoco cu carpachi, nos ta sirbi un Dios bibo, cual nos no tin di traha un cas di spirito, ni tampoco disfrasa na morto pa alaba Dios, pasobra nos Dios ta Soberano.
Nos curpa ta tempel di Dios y e Spirito Santo di Dios ta biba den dje.
Tin pampuna Oranje, Preto, Blanco,pero nan tur ta wordo corta den un forma di Horror, y esey ta haci nos conciente cu no por ta un celebracion di cosecha, pasobra ningun hende ta cosecha den horror, solamente e diabel. Satanas kier imita tur cos, pero tur cos cu e imita ta resulta mahos.
Wak bon con e fiesta di Carnaval ta cuminsa, con bunita trabao pa cose paña, di traha carosa,hopi musica, hopi premio y cantidad di placa ta wordo gasta, pasobra comercio ta ricibi hopi placa.
Di un forma nechi bisa tin hopi placa den circulacion.
Pero tur aña e ta cuminsa y termina na Bebemento,
Bringamento,
Reglamento di cuenta,
Polis ta aresta hende.
Hende ta paga boet of bay sera.
Hopi accidente den trafico,
Hopi mucha laga pa nan cuenta,
Hopi hende grandi den infieldad.
Hopi perversidad y impuresa.
Y por ultimo morto tambe por cay.
Awor con nos por splica un persona cu Dios por ta envolvi den Halloween y Carnaval?
Kisas tin un mayor cu por duna su yiu un splicacion corecto y berdadero di esey?
Pasobra palabra di Dios ta bisa lo siguiente:
E Pueblo aki ta honra Mi cu nan lipnan,ma nan curason ta leu for di Mi. (Marco 7:6).
Pesey considera e miembronan di boso curpa terenal morto pa, inmoralidad, impuresa,pasion,deseo malo,y golosidad, cual ta igual na idolatria, Pasobra ta pa motibo di e cosnan aki, cu e furia di Dios lo bini riba yuinan di desobedencia. ( Colosensenan 3:5-6).
Mira pa ningun no cohe boso preso,door di filosofia,y engaño bano, segun tradicion di hende, segun e principionan elemental di mundo, y no segun Cristo.( Colosensenan 2:8).
Boso no por bebe e copa di Señor y e copa di demoñonan, boso no por tuma parti na e mesa di Señor y na e mesa di demoñonan,( 1 Corintionan 10:21).
No participa den obranan di infructifero di scuridad, sino mas bien expone nan, Pasobra ta berguensa hasta di papia di e cosnan cu nan ta haci na secreto.(Efesionan 5:11-12).
No duna diabel oportunidad,( Efesionan 4:27).
Samina tur cos, tene duro na loke ta bon, abstene di tur forma di maldad.(1 Thesalonisensenan 5:21-22).
Laga nos comporta nos mes, decentemente manera den dia, no den parandiamento, y den buracheria, no den inmoralidad sexual y den sensualidad, no den pleito y envidia.( Romanonan 13:13).
Pesey mira con boso ta cana, no manera hende bobo,ma manera hende sabi, haciendo bon uso di e tempo, pasobra e dianan ta malo. (Efesionan 5:15-16).