Di e forma cu maldad ta aumenta riba e mundo aki , y con matrimonionan y famia ta wordo ataca, ta bon pa nos tuma tempo y refleha pasobra e asunto aki no ta un wega pero un gran berdad.
Na prome lugar si bo ta casa of bo ta bay casa wak bon serca ken bo ta tuma conseho, no corre tuma conseho serca un persona divorcia ,pasobra tur medaya tin su dos banda, y hopi biaha aunke con yega e persona ta di bo, e por ta bo mama of bo tata e no ta conta bo tur e berdad. Dobla bo rudia y consulta cu Dios.
Si bo ta casa bo no por ta papia bo secretonan di bo camber , di bo integridad sexual matrimonial cu bo coleganan di trabao of amigonan di bao di palo, pasobra e ta algo hopi delicado, y bo ta baha balor di bo matrimonio, y bo ta expone bo esposa/esposo na peliger di adulterio.
Y papiando di integridad, mescos cu ta un solo Dios tin y ta e so bo ta sirbi den Spirito y Berdad, un homber casa mester tin un solo muher, y un muher casa mester tin un solo homber, pasobra di otro forma bo ta bira un yoyo di diabel , un berguensa pa bo mes y pa bo yuinan.
Tene cuenta : Pasobra awendia tin hopi desviacion, bo matrimonio por wordo kibra door di un homber of muher y hasta door di un persona di mesun sexo, pasobra diabel ta un gran mentiroso, y e ta daña mente di hende.( Lesa Romanonan 1:21-32).
Tin cosnan bergonsoso ta pasa cu ta solamente nos por haci oracion y pidi Dios tene misericordia.
Esposo y Esposa por fabor laga esaki ta un guia di bon conseho pa bo bida matrimonial:
Pone Cristo Hesus na prome lugar den boso bida, Stima Cristo Hesus (Mateo 22: 35-38).
Sea yena cu Spirito Santo , boso Comfortador ( Efesionan 6:18).
Corda ken ta boso enemigo, bo esposa/esposo no ta bo enemigo, uni hunto den Guerra Spiritual (Efesionan 6 :10-11-12)
Tuma boso responsabilidad Josue 1:6-9 y Filipensenan 4:9).
Saca balki for di boso wowo , confesa y arepenti (Mateo 7:3-5)
Pordona otro reafirma boso amor,comforta otro ( 2 Corintionan 2:5-11).
Papia palabra di bida cu otro tanto esposa/esposo ( Efesiosnan 4:29) ( Proverbionan 18:21).
Pone interes di otro prome den e poder di Hesus Cristo,( Filipensenan 2:1-5).
Esposo stima y cuida bo esposa cu e amor di Cristo Hesus ( Efesionan 5;25-33 y 1 Pedro 3:7)
Esposa respeta bo esposo ( 1 Pedro 3:1-6).
Tene bruheria leu for di boso matrimonio. ( Isaias 8:19).
Pa esnan cu tin pensa di casa: No uni boso mes den yugo desigual, cu incredulonan, pasobra ki compañerismo tin den husticia y inhusticia, y ki comunion lus tin cu scuridad.
Prome cu bo casa cu un persona wak pa e persona ta stima Dios y respeta su mayornan pasobra si e no ta stima Dios ni tampoco tin respet pa su mayor abo no por haña respet for di dje. Esaki ta conta pa homber y muher. Stop di wak, bon curpa, bon tipo y placa.
No drenta barco matrimonial cu un abusador/malbado/inmoral y pensa cu despues e ta bay cambia. Esaki ta conta tanto pa homber y muher. Corda bon cu awendia tin abuso fisico, mental, sexual y verbal y tur tipo di abuso ta laga trauma atras.
Aunke divorcio a bira un negoshi y hende a perde temor di Dios,corda kico ta para scirbi den Malaquias 2;16 tocante adulterio y maltrato di bo esposo/esposa. Señor ta odia Divorcio (Lesa Malaquias 2:13-16)
Pidi Dios manda un persona di Su boluntad den bo bida, pasobra Dios semper tin lo miho pa bo, y please warda riba Señor.