Pastor Marcel Balootje: Flohera ta pica, e ta descurasha, y stanca bida di hende

Diabel ta bishita hende floho cu tentacion, y Dios ta bishita esun cu gusta traha cu fabor.

Den Mateo 25 Hesus ta mustra nos bon cla cu flohera no ta bin di Dios, y cu hende floho, ta stroba nan mes di bay dilanti y otro nan.

Ta para scirbi den Mateo 25: 26,28+30: Ma su shon a contesta y a bise: Abo esclavo malbado y floho, bo tabata sa cu mi ta cosecha caminda mi no a planta, y cu mi ta recohe caminda mi no a strooi simia.Pesey kita e talento for di dje y dune na esun cu tin e dies talentonan.Tira e esclavo cu no ta sirbi pa nada den e scuridad pafo, Den e lugar ey tin yoramento y mordemento rida djente.

Awor con bijbel ta identifica un hende cu no ta sirbi pa nada?

Ta para scirbi den Proverbionan 6:12 lo siguiente:

Un hende cu no ta sirbi pa nada, un homber malbado.

Cu ta kinipi wowo.

Cu ta haci seña cu pia.

Cu ta mustra cu dede.

Kende cu perversidad den su curason, ta plania maldad, continuamente.

Kende ta sembra desunion.

Pesey su calamidad lo bin diripiente, instantaneamente, e lo wordo kibra,

Y lo no tin curamento,

Esun cu ta cultiva su tera lo tin pan na cantidad,ma esun cu ta corre tras di vanidad, tin falta di comprondemento.( Proverbionan 12:11).

Man di hende balente lo goberna,ma negligencia ta hiba na trabao forsa. ( Proverbionan 12:24).

Un floho ta hinca su man den tayo,ma ta mucho cansancio pe , pa hibe bek na su boca.( Proverbionan 26:15).

Flohedad ta pone hende cay den soño profundo, y un hende cu ta sinta pornada lo sufri hamber.( Proverbionan 16:15).

E enemigo di nos bida, ta manda e spirito di flohedad riba hende pasobra tin tres tipo di flohera:

Flohera Fisico: Esey ta hende nan cu no kier traha y cu ta busca tur tipo di excuus pa no traha, pero nan kier pa placa yega facil serca nan.

Flohera Mental: Esaki ta aparece hopi den mucha, caminda nan no kier bay scol, nan no kier studia, y nan tin hopi excuus pa no studia, den tur cos nan ta busca un salida.

Flohera Spiritual :

No kier haci oracion,

No kier bay iglesia,

No kier alaba Dios,

No kier haci ayuno,

No kier tuma ningun responsabilidad den cas di Dios.

Tur momento ta yega laat na servicionan.

Hopi biaha e frialdad aki ta bini slow den bida di un hende, y sin e persona tuma nota e ta bay atras spiritualmente, y ora e bin nota e ta domina bao di e spirito di flohera spiritual.

Pesey como mayor ta recomendabel pa encarga nos yuinan cu trabao di cas y cu responsabilidad, pa asina nan crece como hobennan responsabel y no floho, pasobra flohera ta pone hobennan lanta iresponsabel, y ta stanca e proposito di Dios den nan bida.

Esfuerso semper lo wordo balora, pero flohera ta kibra amistad, y tambe daña relacion , ta trece division, y pobresa, y nos tur sa cu nos Dios ta un Dios di orden y flohera y asuntonan slordig  no ta den boluntad di Dios, y hende floho nunca ta na ora pa traha.

Flohera ta atrae mentira, falta di respet,orguyo y arogancia, flohera ta cana hunto cu mal pensamento.

Hopi biaha flohera ta hiba hende na bende droga, y otro formanan di yega na placa facil , pero cu hopi chens di termina den prison.

Flohera ta un pica, e no ta di Dios.laga nos aleha flohera for di nos bida.