Den un mundo yen di maldad, caminda inmoralidad ta wordo acepta como un forma di biba, y cada dia e rechaso pa e palabra di Dios, ta bira mas grandi, ta duna nos un señal cu nos mester predica mas e palabra di Dios, tur caminda, pasobra e binida di nos Señor Hesus Cristo ta serca,
Tur e cos nan malo cu ta lanta , ta pone nos compronde cu e diabel sa cu su tempo ta serca y ta haci tur locual ta posibel, pa e por gara hopi hende, y hiba nan den e laman di candela hunto cune, caminda solamente lo tin gruñamento di djente, y yoramento.
Dios ta haci un yamada riba nos tur pa nos pa firme:
Para firme come hoben aparta, bo mes for di maldad.
Para firme como mayor dunando bon ehempel den bo hogar.
Para firme den e palabra di Dios, y asina desvia e flechanan di e enemigo.
Para firme na bo trabao, pa tur hende por sa cu bo ta un siervo Dios.
Para firme den bo actitud, tanto na cas como riba caya.
Para frime como homber sabiendo cu bo ta un creacion di Dios y bo identidad ta bini for di Dios.
Para firme como muher sabiendo cu bo ta un creacion di Dios y bo identidad ta bini for di Dios.
Para firme den bo oracion, y bo ayuno, ganando forsa spiritual y sabiduria di Dios tur momento.
Para firme den santidad y puresa, recordando tanto homber /muher cu bo curpa ta tempel di Dios.
Para firme den bo fe, libra bo mes di tur idolatria, y sirbi solamente Dios.
Para firme contra tur e plannan di e enemigo, door di somete bo mes na Dios.
Dios ta yama nos pa para firme , pasobra Dios a duna nos autoridad pa para firme.
E tempo ta malo pero nos firmesa mester briya riba tur clase di scuridad cu kier avansa.
Dios ta lus y den dj’E no tin nada, nada di scuridad.
Como mayor si nos kier mira cambio den nos hogar , ta nos ta e prome cu mester para firme den fe, pasobra asina nos ta logra kibra e plannan di e enemigo. Nos yuinan mester mira seriedad den nos, con nos ta clama na Dios y con e resultado ta bini pa nos.
Sea alerta para firme den fe,actua manera homber, sea fuerte.( 1 Corintionan 16:13).
Pesey mi rumannan stima, sea firme, constante,semper abundando den e trabao di Señor, sabiendo cu boso trabao no ta envano den Señor. ( 1 Corintionan 15:58).
Sea sobrio sea alerta, boso adversario,e diabel,ta cana rond manera un leon rugiente, buscando ken e por devora. Ma resisti firme den boso fe, sabiendo cu boso rumannan den henter mundo ta pasando door di e mesun experiencia di sufrimento.(1 Pedro 2: 8-9).
Solamente ora nos para den Fe y cu hopi perserverancia, nos por sali pa dilanti, pasobra nos tur ta propiedad di Dios, nos no por haci nada riba nos mes. E ranca no por florece si e no ta pega den e mata.tin hopi kier purba pero no ta logra nada, si e mata no keda pega na e ranca no tin crecemento, pasobra no tin alimento.(Juan 15:5-6).
Pa nos para firme nos mester sirbi Dios 100% y no 50 % Dios ta un Dios jaloers y e ta demanda temor y respet di nos.
Ta tempo pa nos reafirma nos fe den Cristo Hesus, pa nos para firme stop di corre di aki pa aya.
Ban hala mas serca Dios.
