!!! Falta di pordon ta un tortura personal, ora bo kere ta hende bo ta castiga, ta bo mes bo ta perhudica, pasobra e hende su maldad ta bira asina importante den bo bida, cu hopi biaha e ta corta bo apetit, of bo soño, y esey no ta boluntad di Dios.Nos mester pordona y laga los.
Falta di pordon ta un trampa cu diabel kier pone den mente y curason di hende pa asina hiba bo na rabia , amargura y vengansa, cual ta cosnan extremadamente dañino pa salud di hende.
*** Falta di pordon ta pica ( Mateo 6:14-15).
*** Falta di pordon ta habri caminda pa spirito malo ataca bo.
*** Falta di pordon ta habri porta pa malesa.
*** Falta di pordon ta hiba nos na odio.
*** Falta di pordon ta invita spirito di revancha y crimen den bo bida.( Deseo pa haci daño na otro).
*** Falta di pordon ta stroba bo progreso y bendicion.
*** Falta di pordon ta haci bo bida infeliz.
*** Falta di pordon ta haci bo rebelde y murmurador.
*** Falta di pordon ta hiba bo na bruheria.
*** Falta di pordon ta causa di suicidio.
*** Si bo muri sin arepenti di e pica di falta di pordon ta den fierno bo ta bay resulta.
No ta facil pa sali for di un dolor grandi cu un hende por a haci bo den bo bida, pero Dios ta exigi di nos pa nos pone tur cos den su man, y pa nos curason por keda liber, pa nos por tin contacto cu Dios y su Spirito Santo, pa asina satanas no cohe bentaha den nos bida.
Pasobra una bes e enemigo logra di kita bo pas spiritual y mental, bo por bira victima di cualkier enfermedad pasobra falta di pordon ta habri porta pa malesa, pasobra e ta daña organo den bo curpa , y bo wesonan.
I ki ora cu boso ta para haci oracion, pordona si boso tin algo contra un hende, pa boso Tata cu ta den cielo,tambe pordona boso, boso transgreshonnan. Ma si boso no pordona ,boso Tata cu ta den cielo tampoco lo pordona boso transgreshonnan.(Marco 11:25). Falta di pordon ta stroba bo bida di oracion.
Laga tur amargura, furia,rabia, griteria,y calumnia wordo kita for di boso, hunto cu tur malisia, Y sea cariñoso cu otro, misericordioso, pordonando otro, mescos cu Dios den Cristo tambe a pordona nos. ( Efesionan 4;31-32).
No huzga, y boso lo no wordo huzga,no condena, y boso lo no wordo condena, pordona, y boso lo wordo pordona.( Lucas 6;37).
Ora nos ta biba cu odio y falta di pordon den nos curason, esey ta haci nos bida amarga, cu nos no por reacciona riba nada bon, y cosnan negativo por domina bo mente, y bo pensamento nan ta wordo daña continuamente.
Pero corda bon locual ta para scirbi den e palabra di Dios: Ken cu ta odia su ruman ta un matado y boso sa cu un matado, no tin bida eterno ta permanece den dje.( 1 Juan 3:15).
Si un hende bisa: Mi ta stima Dios , y e ta odia su ruman, e ta un gañado, pasobra esun cu no ta stima su ruman cu e a mira, no por stima Dios, kende e no a mira.( 1 Juan 4:20).
Dios sa bon ken ta pordona di berdad, ken ta gaña pordona, of ta pordona ora ta cumbini nan, pero tur esey no ta obra na bienestar di bida di hende, pasobra na final tur cos lo sali na cla.
