Den un mundo caminda scuridad ta abunda, maldad den tur skina, inmoralidad kier surpasa norma y balor. Nos mester tene cuenta cu:
no tin Hende perfecto,
no tin Famia perfecto,
no tin Iglesia perfecto,
no tin Scol perfecto,
no tin Gobierno perfecto,
no tin Dokter perfecto,
no tin Banco perfecto,
y no tin Hospital perfecto.
Awor nos ta bisa esaki, pasobra tur caminda cu tin hende fout por wordo cometi.
Pa asina nos tur por realisa,cu solamente Dios ta perfecto, y solamente Dios ta bon.
Pesey Dios den su inmenso amor y misericordia, a demostra na nos cu si nos ta biba den fieldad y obedencia na dj’E anto e ora ey exito lo alcansa nos bida y exito lo sigi nos.
Solamente sea fuerte y tene hopi curashi, percura di haci conforme henter e lei cu mi siervo Moises a ordena bo, no bira for di dje ni na man drechi, ni na man robes, pa bo por tin exito unda cu bo bay. (Josue 1:7).
E buki di ley aki lo no aparta for di bo boca, ma bo mesrer medita den dje di dia y anochi, pa bo percura di haci conforme, tur loke ta para scirbi den dje.Pasobra e ora ey lo bo haci bo caminda prospera, y e ora ey lo bo tin exito.(Josue 1:8).
Tin hende ta gusta tende e asunto di cu hende no ta perfecto, pa asina nan por keda dwaal den e bida inmoral, y paranda , sin arepenti, usando mesun excuus barata tur momento.
Pesey Dios cu sa tur cos a laga e bijbel pa nos pasobra e bijbel ta e palabra di Dios cu tin poder pa cambia bida di hende y ta para scibi ;
Tur scritura ta inspira pa Dios,y ta util pa siñansa, pa reprendemento, pa coreccion, pa educa den husticia, pe e hende di Dios por ta perfecto, ekipa pa tur bon obra (2 Timoteo 3:16).
E palabra di Dios tin poder pa transforma bida di hende, pa duna hende un direccion nobo,pasobra tur cos bieu a pasa y a wordo haci nobo ora un persona entrega su bida na Cristo Hesus.
Ta para scirbi: E pasonan di un hende ta stablesi door di Señor. Y E tin delisia den su caminda. Maske e trompeca e lo no cay pasobra Señor ta sostene cu Su man. ( Salmo 37:23-24).
Husticia di e hende perfecto, lo dirigi su caminda, ma e malbado lo cay pa medio di su mes maldad. ( Proverbionan 11:5).
Pa medio di nos fieldad , nos comunion cu Dios ta aumenta, y nos lo mira milager sosode den nos bida, pa medio di fieldad y obedencia.
Fieldad y obedencia na Dios ta bini for di e naturalesa di humildad cu mester ta biba den cada un di nos.
Ora nos ta reconose Dios tur momento den nos bida ta señal cu e luz di Dios ta presente den nos bida , pasobra nos tin comunion cu Dios.
Un bida di oracion, firme y constant ta aumenta, fieldad y obedencia, pero tambe ta duna nos e seguridad cu Dios nunca lo laga nos desampara.
Nos bida, nos crecemento den tur area di nos bida ta depende 100% riba nos fieldad y obedencia na Dios.
Pasobra e palabra di Dios ta siña nos, cu pega na Dios nos por tur cos, leu for di Dios nos no ta logra nada, pasobra e rama cu separa for di e mata no por duna fruta.
Tur momento laga fieldad y obedencia, dirigi nos curazon.