Bo curason ta valioso.
Bo curason ta fuente di tur locual bo ta haci.
Bo curason ta bao di atake constant.
Ma e cosnan cu ta sali for di boca ta sali for di curason, y ta esey ta contamina e hende. Pasobra for di curason ta sali pensamento malo, matamento,adulterio, fornicacion,ladronisia,testimonio falso,calumnia. Esakinan ta e cosnan cu ta contamina hende, ma come sin laba man no ta contamina hende.( Mateo 15:18-19).
Warda bo curason riba tur cos,pasobra e ta fuente di bida.Kita for di bo un boca engañoso,y tene lipnan perverso leu for di bo.( Proverbionan 4:23-24)
Crea den mi un curason limpi O Dios, y renoba un spirito recto den mi.( Salmo 51:10).
Ora nos curason fisicamente no ta funciona bon, nos ta hopi preocupa, pasobra si nos curason para bida a caba.
Pero ora nos curason spiritualmente ta yena cu maldad pasobra nos a permiti cosnan di mundo venena nos curason, nos ta tarda pa arepenti y drecha nos relacion cu Dios.
Por ehempel nos por a pasa dia tras dia ta pleita , añanan ta reboltia den odio , vengansa y amargura.
Y hasta hopi biaha nos ta pasa odio y rabia over pa nos yuinan manera ta un herencia.
Un mucha cu lanta cu odio den su curason ta lanta spiritualmente manca, pasobra diabel ta un mentiroso, e mucha ey na un edad hoben por bira un patient di curason, pasobra rabia, odio, y amargura, ta causa daño fisico na curason di hende.
Ora un hende no kier tende palabra di Dios,of e a tende pero e kier permanece den su maldad, inmoralidad, falta di respet di Dios, un bida di pica y hopi biaha kier hala otro hunto cune door di e malicia cu ta biba den su curason,
Dios ta manda un respondi personalmente pa nos tur bisando:
Ma pa motibo di bo capricho y bo curason cu no kier arepenti bo ta montona furia pa bo mes den e dia di furia y revelacion di e huicio di Dios. Kende lo paga cada ken segun su obranan. ( Romanonan 2:5-6).
Dios manera semper ta demostra su amor y su misericordia na nos dunando oportunidad pa hende arepenti y cambia bisando:
Lo Mi duna nan un curason y pone un spirito nobo den nan. Y lo Mi saca e curason di piedra for di nan carni,y duna nan un curason di carni. Pa nan cana den Mi statutonan, y warda Mi ordenansa y cumpli cu nan.
E ora ey nan lo ta Mi pueblo y Ami lo ta nan Dios.
Ma esnan cu ta sigi tras di nan cos repugnante y tras di abominacion, Lo mi trece nan conducta riba nan cabes, Señor ta declara.( Ezekiel 11:19-20-21).
Tur hende mester ta bon na altura, cu no ta e pueblo di Israel so ta pueblo di Dios , pero tur esnan cu kere den Cristo Hesus manera Dios ta ordena den Juan 3:16-18 lo ta salba y confirma esey manera ta para scirbi den Romanonan 10:9-10 ta pertenece na e pueblo di Dios y lo wordo guia pa e Spirito di Dios manera ta para scirbi den Romaonan 8:14.
Dios no tin yiu di afo:
Pasobra ta para scirbi: Ma tur esnan cu a ricibi’E ,na nan E a duna e derecho pa bira yuinan di Dios, esnan cu a kere den Su nomber.( Juan 1:12). Cu no a nace di sanger,ni di boluntad di carni,ni di e boluntadnan di hende, ma di Dios.
Ta pesey cada un di nos mester entrega nos curason na Dios.
