Diabierna awor nos ta recorda diaberna Santo,cual ta e sufrimento y morto di nos Señor Hesus Cristo. Pero hopi di nos no ta drenta profundo den beibel pa asina nos por biba cu e realidad , Hesus mes a bisa cu un di e 12 disipelnan lo traicione, y asina e historia a tuma lugar.
Pero locual ta hopi notable ta cu ora Judas a mira locual e a haci , su consenshi a remorde y Judas abay bek serca e principal y e ancianonan, pa debolbe e placa y Judas a bisa: Mi a peca door di traishona sanger inosente. Ma nan a bise Kico nos tin cu nes, Esey ta bo asunto (Mateo 27 vers 3+4)
Hopi biaha ora nos ta cana den e caminda di Dios, y tin hopi tentacion rond di nos, cu ta hala nos atencion y distrai nos, pero tin algo cu nos mester tene cuenta cu ne, cu ora e mundo caba di usa bo nan a bisa bo ta bo asunto.
Hopi biaha tin hende no ta balora un bon matrimonio, ni tampoco un famia sano,y nan ta sali di parranda, y rebaha, nan esposa/esposo y nan famia completo door di ta asocia, cu hende cu ta hiba nan den adulterio of un bida di parranda, cu consequencia cu matrimonio y famia ta kibra.
Pero un cos bo tin di tene bon na cuenta ta cu despues cu e byside of e muher di bida of amigo di parranda caba di kibra bo famia, nan lo bisabo ta bo asunto.
Pasobra ningun momento so e Amistad tabata pa yudabo, sino pa kibrabo, den e caso di Judas ta e a bay serca e anciano y principalnan, den e caso di Samson ta e a bay Gaza y cuminsa realacion cu prostituto, den caso di Ananias y Safira ta nan dos a laga satanas gaña nan pa nan gaña e Spirito Santo di Dios, cual a resulta den nan morto.
Wak bon cada un di nan su historia a termina cu morto fisico.
Separacion for di Dios ta causa morto spiritual, y hasta morto fisico, pero hopi biaha nos no ta ripara te na e momento cu ta laat, pasobra orguyo y rebeldia ta trece tardansa den bo bida spiritual, pasobra bo ta drenta e mundo di scuridad.
Hopi biaha nos ta mete den e mundo, y nos ta bisa ta djis pa un momento, pero e enemigo kier bo pa semper, cuanto no a drenta den e mundu di droga, alcohol, carnaval, parranda, gamble, pornografia,bruheria,passion baho,pa un anochi y te awe nan no por sali.
Mester tene na cuenta ,y e por zona duro, cu un persona cu ta maltrata su yiunan, abusa, keda sin crianan, abusa sexualmente di mucha, viola, bati su esposa/esposo y den ningun caso nan no tin culpa di nada, e abuso ta tuma lugar, pasobra e persona no por controla su emocion, nos tin di bisabo cu bo ta mete cu sanger inocente.
Si bo kita un hende for di trabao sin motibo, perhudicando su famia y pone cu su yiunan lo pasa hamber , bo ta mete cu sanger inocente, si bo mata hende pa Buena gana djis pasobra bo tin un arma, y henter un famia keda perhudica , bo ta mete cu sanger inosente, si bo ta menasa hende, y pone cu den un cas hende no por drumi anochi pa motibo di bo menasa bo ta metiendo cu sanger inocente.Cada biaha cu un persona mayor di edad mester viola un mucha , bo ta mete cu sanger inocente.
Hopi biaha decision ta wordo tuma sin wak, ken lo wordo perhudica, djis pasobra bo tin razon, of mester cumpli cu regla, sin wak cu tin sanger inocente envolvi.
Judas a arepenti, pero tabata laat, pero nos tur sa cu ta para scirbi cu esey mester a sosode , pa asina su traicion a Pusha Cristo Hesus hiba na nos salbacion. Pero awor cu nos ta drenta Semana Santa laga arepentimiento drenta nos curazon, y qualkier persona cu sa cu e ta hacienda daño na sanger inosente, bira bek di su mal caminda, y ricibi pordon di Dios.
Ta tempo pa samina nos curazon, y busca di Dios.