Pastor Marcel Balootje: E presencia di Dios ta mas poderoso cu tur mal influencia

E presencia di Dios ta hala hende serca Dios.

Mal influencia ta hiba hende den scuridad y inmoralidad, asina aparta hende for di e boluntad y principionan di Dios.

No laga hende gaña boso: Mal compania ta daña bon custumber, uza boso sano huicio manera mester ta, y stop di haci pica, pasobra algun no tin conocemento di Dios.Mi ta bisa esaki pa bergonsa boso. ( 1 Corintionan 15:33).

Esun cu anda cu hende sabi lo ta sabi,ma e compañero di hende bobo lo sufri daño.

Mal influencia ta purba drenta tur caminda, hasta den e lugar di mas halto den gobernacion rond mundo, den palacio di reynan y principenan, mal influencia ta stima hende sabi, pa e haci nan bobo, door di aleha nan for di Dios. Pasobra influencia ta e habilidad di produci efecto riba hende.

Ta masha hopi influenciador tin ta cana rond buscando gloria pa nan mes, mientras cu esnan cu ta busca e presencia di Dios ta duna Gloria na Dios prome ( 1 Reynan 18:37+38).

Hopi di e mal influenciadornan tin hopi hende domina,

Mal influencia ta pone hende kere den fantasia, pasobra e diabel sa cu e no por crea nada. Pasobra e unico Creador ta Dios, diabel ta corumpi nan mente pa asina nan kere den fabula, y rechasa e berdad di Dios.( Romanonan 1:21).

 Anto Moises a bisa Dios: Si bo presencia no ta bay cu nos, no hiba nos for di aki nan.(Exodo 33:15). Ora e presencia di Dios ta hunto cu nos tin sanacion y liberacion, y nos bida ta wordo bon guia, pasobra e presencia di Dios ta Dios mes.

Con nos ta yega na e presencia di Dios?

***** Uno: Reconociendo Cristo Hesus como nos unico y suficiente Salbador.

***** Dos : Cana den obedencia na Dios.

***** Tres : Laga Cristo Hesus ta e prioridad den nos bida.

***** Cuater: Pone tempo disponibel pa Dios, den oracion y ayuno.

***** Cinco; Arepenti di tur nos picanan.

Tur e hombernan cu Dios a usa y cu a cana cu e presencia di Dios tabata hombernan di oracion .y ayuno.

Pablo: Hechos 16:25.

Pedro :Hechos 10:9.

Elias :Santiago 5 :17-18.

Daniel : Daniel 6:10.

Jesus mes a ayuna : Mateo 4 ;2 

Pablo a ayuna 2 Corintionan 11:27.

Daniel a ayuna Daniel 9:3.

David a ayuna Salmo 69:10.

Ta tempo pa sali for di gara di e influenciadornan maligno cu ta cana rond pretendiendo cu nan por yuda hende y caba nan no por yuda nan mes. Nan ta cambia e berdad pa mentira, y bisa hende locual ta kishiki na horea. Sensualidad ta nan pan di cada dia.

Pesey ta bon pa tur hende habri wowo pasobra mal influencia ta reina tur caminda, pasobra nos ta bibando den tempo trabahoso, caminda hende a bira stimado di nan mes, Hende a perde amor pa nan prohimo, y solamente ta pensa riba placa y poder, malicia y inmoralidad.

E presencia di Dios, tin su preis, pasobra nos mester biba pa Dios pa experiencia e presencia di Dios.

E mal influencia, ta manera un ladron, buscando cos di horta, pesey nos mester ta lihe, sobrio y constant den presencia di Dios , pasobra e dianan ta malo.

E plan di diabel ta pa gara hende su mente y curazon y yena na cu mal influencia, pa asina nan no obedece Dios, pero sigi den nan arogancia ,malicia y violencia , y perde tur temor pa Dios.

No tin ningun ganashi pa laga mal influencia domina den bo bida.