Pastor Marcel Balootje: E presencia di Dios den nos hogar ta haci e diferencia

Ta masha necesario pa tur hogar , ta un prioridad, ta un mester, pasobra ta algo cu nada na mundo no por reemplasa y esey ta e presencia di Dios.

Pa falta di conocemento, pa falta di temor di Dios, y pa falta di e presencia di Dios , hopi hogar ta dividi, hopi matrimonio ta kibra, hopi divorcio ta tuma lugar, y hopi mucha ta keda bandona.

Asina cu muchanan no ta den nan cas hunto cu tur dos nan mayornan original, tin un kiebro den nan bida social, den nan formacion, den nan amor y respet, y mas cu tur cos den nan curason.

Nan lo lanta y bisa, ami a lanta sin mi tata of mi mama, pasobra nan a divorcia ora mi tabata chikito.

Tene cuenta cu e kiebro ey den bida di e mucha por ta un marca pa semper.

Mas cu oro, mas cu plata,mas cu trabao, nos mester di e presencia di Dios, den nos hogar, pasobra e presencia di Dios , ta trece pas, sabiduria, comprendemento, amor trankilidad, pasobra e presencia di Dios ta Dios mes.

Den un cas caminda tin presencia di Dios, violencia domestico, adulterio, inmoralidad y abominacion no por ta presenta, pasobra e presencia di Dios ta corre cu maldad.

No worry cu locual bo bisiña ta pensa di bo, ni tampoco locual bo coleganan di trabao ta vocifera, no laga pensamento di hende dirigi bo bida, tampoco aplica e bagamunderia di internet den bo cas, pero ta hopi necesario pa bo busca e presencia di Dios pa bo hogar.

Pa yega na e presencia di Dios, nos mester tin un bida entrega na Dios, pasobra caminda no tin seriedad no tin entrega, pasobra si bo ta duda, den Dios , Dios no por contesta bo oracion.

Ora nos arepenti y entrega nos bida na Dios, eynan e proceso largo di crecemento ta cuminsa, pasobra Dios no ta bay duna bo tur cos mesora, ta segun bo ta perservera, segun bo ta pidi, segun bo ta busca, y demostra fieldad y lealtad na Dios, Dios den su misericordia, ta habri e portanan di oportunidad cu bo mester.

Door di entrega nos bida completo na Dios, nos ta wordo yena cu Su Spirito Santo, y nos lo cuminsa sinti su presencia, y lo reconoce cual ta e cosnan cu ta atrae Su presencia den nos bida, cual ta humildad, amor,husticia, berdad, pordon y misericordia.

Igual cu eseynan ta atrae presencia di Dios pa nos bida, nan ta atrae presencia di Dios den nos hogar, ora nos haci tur locual ta posibel pa humildad,amor husticia, berdad, pordon y misericordia ta visibel den nos hogar.

Tin hopi cos ta move den mundo y riba caya, pero ora e presencia di Dios ta den bo hogar, locual ta impuro y locual no ta di Dios no por drenta bo hogar. ( Isaias 54:17).

Esun cu ta biba bao di e proteccion di e Haltisimo, lo permanece den e sombra di e Todopoderoso.( Salmo 91:1).

Pesey laga nos aserca e trono di gracia cu confiansa, pa nos ricibi misericordia, y haña gracia pa yuda den tempo di necesidad.(Hebreonan 4:16).

Humiya boso mes anto, bao di e man poderoso di Dios,pa E por halsa boso na e tempo apropia.Tirando tur preocupacion riba dje, pasobra E ta percura pa boso.( 1 Pedro 5:6-7).

Hesus a bisa bin serca Mi tur cu ta cansa y carga y lo Mi duna boso sosiego.(Mateo 11;28).

E presencia di Dios den nos bida, nos hogar, matrimonio y famia, ta tur locual cu nos mester.