Den tur e turbulencia cu mundo ta pasando aden,cual nos tambe ta forma parti di dje:
Hende ta hala aki,
Hende ta hala aya,
Hende ta kita y pone, Hende ta dicidi riba nan mes,
Hende ta busca condena pa nan curpa sea pa ignorancia, of pa rebeldia y duresa di curazon,
Hende ta hala otro bay cune den inmoralidad,
Hende ta apoya maldad pa propio interes, Y mas tristo cu ta sosode ta cu hende kier sa cu nan mes ta Dios, y no ta respeta Dios, y praticamente a bira lomba pa Dios.
E barco di moral, respet , temor di Dios, amor pa famia, respet pa matrimonio,amor pa nos yuinan,kier mara bek na waf, pero laman ta hopi bruto,falta di responsabilidad y negligencia,ta briya tur dia, y hopi kier tapa solo cu un dede.
Pero den tur locual ta sosode, tin un porta cu ta habri, un porta cu ningun hende por sera, e no ta depende di hende, e no ta depende di politica, e no ta funciona bao di deseo di hende, hende no por dicidi riba dje pasobra E ta dicidi riba tur hende.
Hesus a bisa Ami ta e porta, si un hende drenta door di Mi,e lo ta salba. Y lo drenta y sali y haña yerba berde.( Juan 10:9).
E porta aki ta habri pa tur hende, e ta e porta di salbacion, di liberacion, di gracia y favor.
Ta e porta cu ningun hende por sera pa su prohimo, ta un porta cu tur hende personalmente, mester sinti e urgencia pa drenta, pasobra awe e ta habri mayan cu Dios kier no ta priminti na ningun hende.
Hopi ta cana pasa banda di dje, pero no kier pone e atencion necesario, pasobra nan ta ocupa den hopi cos cu ta distrai nan mente y nan curason, e enemigo ta busca tur manera, pa wanta hende den scuridad, ofreciendo tur tipo di bagamunderia temporal,den cual no tin ningun clase di futuro.
Hesus Cristo ta e unico porta di salbacion, y tur hende mester di salbacion pa nan alma, pasobra esun cu no kere den Cristo Hesus , ta bay perdi,pasobra no tin ningun otro salida, no tin ningun hende, ni tampoco nada cu por reemplasa Cristo den nos bida,y perdi ta nifica separacion eterno for di Dios.(Lucas 16:19-31).
Cualkier hende cu promete otro cos,y cu no ta proclama Cristo como nos unico Salbador ta un mentiroso, y ta guia hende den caminda di destruccion.
E porta hancho, caminda tur cos por, caminda no tin respet, caminda inmoralidad, y maldad ta domina ta hancho habri, y hopi ta cay den tentacion, y sin Cristo Hesus ta imposibel pa sali for di e caminda di maldad.
Drenta den e porta smal, pasobra hancho ta e porta y espacioso ta e caminda cu ta hiba na destruccion, y hopi ta esnan cu nta drenta door di dje.
Pasobra chikito ta e porta y smal e caminda cu ta hiba na bida, y poco ta esnan cu ta hañe.( Mateo 7:13-14).
Hopi porta grandi y espacioso ta wordo ofreci, y hopi ta esnan cu ta sabi, y ta wordo engaña, pasobra nan ta kere den nan mes, nan kier depende riba nan mes , y sin temor di Dios,ta confia den nan mes, y ta resisti e palabra di Dios y e Spirito Santo di Dios.
Awe e porta ta habri, pero mayan no ta priminti na ningun hende, pasobra e binida di Cristo Hesus ta serca, no ta tempo pa bay tras di cosnan cu no tin e respaldo di Dios su palabra, pero ta tempo pa busca Señor di henter nos curazon.