Pastor Marcel Balootje: E nomber di Dios, y e palabra di Dios, ta activa poder na esnan cu ta kere

Lamentablemente tin hopi hende cu kier ricibi bendicion y milager for di man di Dios , pero no ta kere den Dios,

***Dios a spierta nos den su palabra, pa ora nos ta pidi algo, pa nos pidi cu Fe y no duda.

***Pasobra no laga esun cu ta duda kere cu e ta ricibi algo di Dios, siendo un persona di curason dobbel, inconstante den tur su caminda nan .(Santiago 1:6-8).

For di principio nos tin di reconoce cu Dios a crea tur cos pa medio di Su palabra (Genesis 1:3-31).

***Dios a papia cu Noe y Noe a obedece Palabra di Dios, traha un arca, salba su famia, y henter e mundo animal.

***Dios a papia cu Abraham pa e sali for di su tera y bay na e tera cu Dios ta mustre y aya Dios a hacie un nacion grandi, y den tur famia di mundo lo e ta bendiciona. Abraham a obedece e palabra di Dios.

*** E gigante Goliat tabata invita e pueblo di Israel, pa bringa , y rey Saul y tur su ehercito no por a enfrenta e gigante, pero David a yega como un hoben sin ningun experiencia militar, solamente e ta un cuidador di carne cu a yega di bringa cu leon y cu beer. David a bisa Goliat , bo ta bini contra mi cu spada y cu lansa pero ami ta bini contra bo den e nomber di Señor di ehercitonan, e Dios di ehercitonan di Israel kende bo a reta. ( 1 Samuel 17:45). David a usa e nomber di Dios.

*** Den Exodo 14:14-15, Moises a obedece e palabra di Dios y Israel a sigi padilanti, y crusa Laman Cora. E Palabra di Dios y e obedencia di Moises a libera e pueblo di Israel.

*** Y ora E a caba di papia,E a bisa Simon. Bay caminda tin awa hundo, y tira boso redanan pa boso cohe pisca. Simon a contesta,y a bisa, Maestro nos a traha duro henter anochi y no a cohe nada, ma riba bo palabra lo mi tira e redanan. Simon Pedro a kere den e palabra di Hesus, y esey a dune e victoria.(Lucas 5:4-5).

Awor a yega e momento, pa nos tur busca e cara di Señor y entrega nos bida na Señor pa asina e Palabra y Poder di Dios por wordo activa den nos bida. Pasobra Hesus a bisa den Marco 16:17 cu e señalnan aki lo compaña esnan cu ta kere.

Pero no lubida pa nos ricibi e señalnan nos mester cumpli prome cu locual Hesus ta bisa den Marco 16:15+16.

Situacion  riba mundo actualmente ta asina peligroso cu esun cu no ta kere den Dios, facilmente ta kere den diabel, pasobra diabel kier imita tur cos, pasobra e no por crea nada, e ta daña mente y curpa di hende pa asina nan no kere den Dios.  

Mayornan mester ta esnan cu ta duna ehempel di Fe den Dios, pa asina e yuinan por scucha nan testimonio, y asina hala serca Dios, pasobra a base di nos testimonio, nos yuinan su fe den Dios ta crece.

Señor ta bisa :Asina Mi palabra cu ta sali for di Mi boca lo ta: E lo no bolbe bashi serca Mi,sin cumpli cu loke Mi ta desea y sin alcansa e proposito cu cual Mi a mande.( Isaias 55:11).

Nos tur mester busca Dios den ayuno y oracion, pa ricibi guia y bendicion di Dios, den tur situacion, pasobra Dios su Palabra y su Poder no ta cambia.