Den un mundo caminda maldad ta reboltia tur dia, caminda nos a wordo avisa pa medio di e palabra di Dios, cu temponan trabahoso lo bini:
Y cu hende lo bira stimado di nan mes.
Stimado di poder y no ta importa kico nan mester haci, ni tampoco cu ken of cu kico nan mester asocia, basta nan keda mantene e status.
Y cu nan lo no soporta doctrina sano mas , pero alcontrario kier satisface nan mes deseo.
Awel Dios den su inmenso amor ta yama nos pa perservera , esaki ta nifica sigi persisiti den e berdad di Dios te na e binida di Cristo pa asina nos por bay cune, no haci cos di floho, ni tampoco neglisha e berdad, pero para firme pa asina nos ricibi e corona di bida.
Nos rudia mester sigi dobla dilanti di Dios, y nos boca mester keda proclama Su evangelio, pasobra esey ta boluntad di Dios , pa Su palabra alcansa henter mundo.
Revelacion 3;8 ta para scirbi: Mi conoce bo obranan, mira Mi a pone bo dilanti di un porta habri cu ningun hende no por sera,pasobra bo tin poco poder,y a warda Mi palabra y no a nenga Mi nomber.
Revelacion 3:10 ta para scirbi:Pasobra bo a warda mi mandamento pa perservera, Ami tambe lo warda bo den e ora di prueba cu lo bini riba henter mundo, pa pone esnan cu ta biba riba tera na prueba.
Esun cu perservera te na fin esey lo ricibi e corona di bida.Door di boso perserverancia boso lo gana boso alma.( Lucas 21:19).
No solamente esaki ma nos ta regosiha tambe den nos tribulacion, sabiendo cu tribulacion ta produci perserverancia,y perserverancia karakter,y karakter speransa, speransa no ta despunta, pasobra e amor di Dios a wordo derama den nos curason door di Spirito Santo, Kende a wordo duna na nos.
Bendiciona ta e hende cu ta perservera den prueba, pasobra una bes cu e pasa e prueba, e lo ricibi e corona di bida,cu Señor a priminti na esnan cu ta stima Señor.( Santiago 1:12).
Si nos perservera nos lo reina tambe cun’E,si nos neng’E, E tambe lo nenga nos.(2 Timoteo 2:12).
Nos ta para na un lugar hopi inportante den nos bida, den cual Hesus ta duna nos e encargo pa nos alerta, coregi tur hende cu ta na nos alcance pa nan sigi perservera, pasobra ta hopi tentacion y hopi malicia, y hopi inmoralidad ta busca pa domina e mundo aki, y hopi hende ta lubida cu ta Hesus tin e ultimo palabra.
Si nos wak rond di nos , nos ta mira con e enemigo di nos alma ta gaña grandi y chiki y aleha nan for di e caminda di Dios, pasobra un persona cu ta rechasa Dios su principio, su mandamento y su boluntad , dificil cu e por perservera den locual ta di Dios.
Spera riba Señor , sea fuerte y e lo fortalese bo curazon, si , spera riba Señor.( Salmo 27:14).
Pasobra boso mester tin perserverancia, pa ora boso haci e boluntad di Dios, boso ricibi loke a wordo priminti. Pasobra denter di masha poco tempo: Esun cu ta pa bin,lo bin, y lo no tarda. Ma e husto lo biba pa medio di fe, y si e hala atras, Mi alma no tin placer den dje.(Hebreonan 10:36-38)
Hende cobarde y incredulo lo no hereda e reino di Dios.( Revelacion 21:8).
Ta keda na cada un di nos pa perservera hunto cu nos Famia, pa nos para firme y spera riba e binida di Cristo Hesus. Haci oracion pa otro.