Pastor Marcel Balootje: E gran bondad di Dios pa nos tur

Den un mundo di rebeldia:

Caminda ta hende rabia cu Dios, 

Hende ta haci bofon di Dios, 

Hende ta rechasa Dios,

Hende no ta of no kier lanta nan yiunan den boluntad di Dios,

Hende no tin temor di Dios,

Hende kier biba manera nan kier y no ta respeta Dios. Nos tin di corda lo siguiente:

Ma Dios a demostra Su mes amor pa cu nos den esaki, cu tempo nos tabata pecado ainda, Cristo a muri pa nos.

Muchu mas ainda, siendo hustifica pa medio di Su sanger, nos lo ta salba for di e furia di Dios, door di dj’E. 

Pasobra tempo cu nos tabata enemigo, nos a wordo reconcilia cu Dios, door di morto di Su Yiu, cuanto mas, siendo reconcilia, nos lo ta salba pa medio di Su bida.

No solamente esaki, ma tambe nos ta regosiha den Dios, door di nos Señor Hesus Cristo, door di kende awor nos a ricibi reconciliacion.( Romanonan 5:8-11)

Ken por a spera esaki, e gran bondad di Dios, pa nos bida, pasobra nos tur a peca y falta e gracia di Dios. No ta existi bon hende, solamente Dios ta bon, tur hende a yega di haci pica den nan bida, pero awor cu nos sa y ta conciente cu Cristo Hesus a muri pa nos picanan y a reconcilia nos cu Dios.

Pa kico sigi biba den pica?

Imaginabo celnan di prison a wordo habri pa un preso pero e no kier sali for di tras di tralie.

Un yiu tin un tata Multi, Multi Biyonario, pero toch e kier biba den pobresa.

Un hende tin remedi, pero e no kier bebe su remedi y ta prefera di keha malo tur dia.

Ta tristo pa bisa, pero capricho, orguyo, duresa di curason, falta di pordon, tin hopi hende biba den e situacion aki caminda diabel a ciega nan wowo pa no mira e bondad di Dios. 

Dios a entrega su Yiu unigenito pa kere cu kere den dj’E no bay perdi ma tin bida eterna.

Pica ta haci hende sinti nan mes rechasa y menosprecia,y nan ta busca tur clase di atencion y aceptacion, pasobra tur hende a wordo crea den imagen y semehansa di Dios.

Pica ta aleha hende for di Dios, pero ora hende realisa , manera e yui perdi,( Lucas 15:7) nan lo compronde cu nan bida ta reconcilia cu Dios pa medio di Cristo Hesus y e unico cos cu nan tin di haci ta kere den Cristo Hesus y biba pa Señor.

O purba y mira cu Señor ta bon, bendiciona ta e hende cu ta tuma refugio den dj’E. O teme Señor boso Su santonan , pasobra esnan cu tem’E no tin falta di nada. ( Salmo 34:8+9).

E bondad di Dios ta hiba hende na arepentimento, y pa haña salbacion, pa medio di Cristo Hesus.

Aparta bo mes for di maldad y haci bon, busca pas y siguie,( Salmo 34:14).

Mi a bisa Señor , Abo ta mi Señor, fuera di bo mi no tin nada bon. ( Salmo 16:2).

Un hende no tin nada bon den dje, si e no entrega su curason na Cristo Hesus, y laga Señor guia su bida, sin Dios nos tur su bida ta bashi, sin ningun clase di speransa y dia tras dia, e enemigo lo traha saus cu nos, pasobra esey nos ta mira sosode mundialmente cu esnan cu kier no kier tende y ta aleha nan mes for di Dios.

Señor laga nos tur yega na e comprondemento cu Cristo Hesus ta e unico caminda di berdad y bida.