Ora nos ta obedecido na Dios nos tin seguridad den tur cos , pasobra Dios ta para na banda di hende obediente. Dios ta e sombra na lado di hende obediente, mientras cu esnan cu ta cana den desobedencia lo conoce insiguridad y silencio di Dios.
Awendia hopi biaha bo ta tende hende ta bisa of expresa cu nan tin miedo, nan ta sinti nan mes discrimina,nan ta sinti nan mes insigur cu nan lo wordo acepta, tur eseynan ta fruta di desobedencia.
Ora un mucha no ta comporta su mes bon, no ta tende di su mayornan, e ta haci locual cu e kier, tur ora e ta insigur pasobra e sa cu e ta den desobedencia, y su relacion cu su mayornan ta deteriora.
Pero ora e mesun mucha ey ta obediente, tur ora e ta contento y sigur cu si e aserca su mayornan pa algo, e ta haña un si di su mayornan, y su mayornan ta apoye den tur locual cu ta bon.
Awel ta mescos cu Dios, ora nos ta cana den obedencia, nos tin sigur di e amor y proteccion di Dios, aunke nos no ta mira Dios, nos sa cu Señor tey.
Ta den obedencia solamente nos ta cana bao di sombra di e Altisimo. Hende desobediente hacido di bofon di Dios no conoce e sombra di e Altisimo, pasobra nan mes no kier drenta bao di e sombra, nan no kier arepenti for di nan mal caminda, Pasobra e sombra di e Altisimo ta pa tur hende obediente.
Den Galationan 5:22-23 nos ta conoce e frutanan di Spirito Santo , cual nos ta yega na dje pa medio di obedencia na Dios. Pasobra e Spirito di Dios ta keto caminda tin desobedencia, ma caminda tin obedencia, tur porta ta habri, y Dios ta revela su mes na nos.
Mescos cu prome cu un hende viaha pa un tera lehano e ta informa di tur cos un poco pa e ta na altura y no hinca su curpa den problema, ta bon pa nos tambe tende cuenta cu tur locual desobedencia por trece pa nos y no usa e palabra “ Laga mi biba mi bida” pasobra e bida ey no ta di bo , e curpa no ta di bo e ta di Dios, ( 1 Corintionan 3:16-17) pesey nos mester ta obediente na Dios.
Esaki ta algun ehempel ora nos laga desobedencia domina nos bida:
* No plania maldad contra bo prohimo, mientras cu e ta biba cu confiansa banda di bo.
* No envidia un hende di violencia, ni scohe ningun di su caminda nan.
* Pasobra hende perverso ta un abominacion pa Señor, ma e tin comunion intimo cu hende recto.
* Maldicion di Señor ta riba cas di e malbado, ma e ta bendiciona e lugar di biba di e husto.
* E ta haci bofon di e bofonadornan , ma E ta duna gracia na e humilde.
* E sabinan( hende obediente) lo hereda honor,ma bobonan ( Hende desobediente na Dios) ta montona berguensa riba nan mes.(Proverbionan 3:29-35).
Awor aki mes den e resultadonan di aña escolar nos por mira e fruta di obedencia, cual ta un smile grandi y tin biaha hasta lagrima di parti di mayor y yiu, ora nan mira cu hunto nan a logra.
Pero otro banda tin tristesa y preocupacion entre mayor y yiu, pasobra obedencia a wordo neglisha.
Obedencia ta mihor cu sacrificio. Tur porta ta habri pa hende cu ta biba de obedencia na Dios.
1 comment
[…] Source link […]