Den e institucion di Dios cu yama matrimonio, Dios a establece un laso entre un homber y un muher pa forma un famia, den cual e homber lo bira e Tata y e muher lo ta e Mama, pasobra nan lo uni sexualmente y produci yuinan pa honor y gloria di nos Dios, pasobra esey ta e mandato di Dios, pa hende por multiplica.
Aunke e sistema di mundo kier kita tur autoridad for di mayornan, hincando muchanan den un libertinahe diabolico, toch nos mester corda cu e bos di un tata den cas ta sumamente necesario.
Ningun Organisacion of Fundacion no por reemplasa e bos di un tata.
Awendia tur tata mester tin un asina yama “ Straight Talk” cu nan yuinan, pa asina nan keda riba bon caminda.
Nos como mayor mester papia cla, pasobra e malbadonan cu kier venena bida di muchanan cu mentira y bagamunderia, ta trece tur sorto di ilustracion y splicacion dilanti pa asina doctrina e muchanan den scuridad.
Internet a wordo inventa pa bon, pero tambe tin hopi maldad riba internet, especialmente pa hala atencion di hobennan, manera uso di arma, bringamento y pornografia.
Y como tata nos mester splica nos yuinan bon cla sin sconde nada, sin discuti, pero dialoga, y mustra nan den amor di tata, cu Dios a yama bo pa para na cabes di bo hogar, pa mustra kico ta bon y kico ta malo.
Tata ta yama pa ta un lider, y protector di famia, pa duna un ehempel di amor di Dios, na tanto su esposa y su yuinan.
E mester para fuerte y firme den Fe, pa siña su yuinan, asina evita cu nan ta cay den gara di e enemigo.
No pega soño y spera cu na scol esey ta wordo splica, pero tuma e iniciativa bo mes como tata, y papia, pasobra mas bo por preveni, mas trankilidad tin den bo hogar.
Un tata no por complace su yiu pa e keda contento y otro banda ta condena su mes y futuro di su yiu.
Ora un tata aproba algo cu no ta bon, por ehempel, permiti un mucha muher menor di edad keda drumi na cas di su frei, e tata ta promociona fornicacion, e ta habri porta pa pica, e ta contra ley, y e ta perhudica e mucha su futuro, pasobra hopi cos por pasa.
Pesey no ta tur cos cu presenta mayornan mester aproba, no laga bagamunderia di mundo, bira ley den bo cas.
Abo ta e bos di bon conseho den bo hogar, pasobra mayan cu Dios kier ta abo tin di duna cuenta na Dios, di locual bo a haci cu e yuinan cu Dios a duna bo.
Tene cuenta cu e spirito di inmoralidad y falta di respet ta rondia hogar di hende, e spirito di violencia y cana cu arma ta tur caminda, y bo bos como tata ta hunga un rol masha importante den bo hogar.
Den 1 Cronicanan 28 : 9 David ta bisa su yiu Salomon bisando:
Pa loke ta abo mi yiu Salomon,conoce e Dios di bo tata, y sirbie cu henter bo curason. Pasobra Señor ta scrudiña tur curason, y ta comprende tur intencion di e pensamentonan. Si bo busca Dios E lo lagabo hañe, ma si bo bandone E lo rechasa bo pa semper.
Nos ta den tempo trabahoso , pasobra tur dia nos ta mira con Juan 10:10 ta cumpli riba e isla aki, cual ta recorda nos cu e ladron a bini solamente pa horta mata y destrui. Pero Cristo Hesus a bini pa nos tin bida y pa nos por tine na abundancia.