Ora nos mira con mundo ta avansa den maldad y inmoralidad, con hende ta reta Dios su mandamentonan, y Dios su principionan, nos ta haci e pregunta :
Cual ta e balor y importancia di Dios den nos bida?
Pasobra ya e respet pa Dios, ta bahando drasticamente, nos ta bibando den un tempo cu hende a bira asina sabi cu nan ta hiba e palabra di Dios corte, of mihor bisa nan ta hiba Dios den un corte terenal, pa asina nan por hustifica nan deseo.
Tin hopi hende ta djis biba pa biba y no ta realisa con lew e ser humano por a yega, pasobra ora nos ta trata di establece of legalisa algo contra e palabra di di Dios, nos ta reta Dios, y cada reto of bofon di Dios tin su consecuencia.
Ta conoci pa nos tur den Romanonan 1:28-32 ta splica detayadamente kico lo basa cu esnan cu boluntariamente ta scohe pa no reconoce Dios y sigi tras di nan duresa di curason, y nan pasion.
Ta para scirbi, y tur hende sa, kico a sosode den pasado, pero hende ta persisti den rebeldia, pero un cos ta sigur, cu Dios no ta chansa, y cu ta doloroso pa cay den man di Dios bibo.
Mescos cu un mucha ta hunga cu candela te ora e kima su man,hende grandi kier forsa algo contra boluntad y principio di Dios pa wak e reaccion di Dios. Dios tene misericordia.
Ta parce manera hende a lubida Juan 3:16 y tambe Juan 3:36 pasobra nos ta nota cu hende ta biba bisando cu no tin Dios, y con cu nos kier, nos ta logra kico cu nos kier, si nos tin cu entama un caso contra Dios pa logra nos meta nos ta hacie, basta nos logra nos meta. Dios tene misericordia.
Hendenan cu a rechasa e plan di salbacion di nos Señor Cristo Hesus, cual ta e unico recurso cu e ser humano tin pa por drenta den cielo.
A bira facil pa hende bira lomba pa Dios,y practicamente ninga Dios su principio y boluntad , treciendo un gran confusion, social y spiritual.
No ta wega pa laga scuridad atrae y domina asina tanto, cu ya nos no ta mira salida mas, pero solamente pasion carnal, rebeldia y orguyo ta domina bida di hende.
Locual ta pasando actualmente ta algo cu nos tur ta bay sinti ora Dios, cuminsa pone su man, pasobra un lo bisa otro, bo ta corda cuanto biaha nos a tende stop , pero toch nos a sigi. manera cu no tin cuenta cu nada.
Cristo Hesus a balora bida, amor, pas , berdad, conocemento,sabiduria,relacion, fe,oracion, y ayuno, alma, husticia, servicio,sacrificio, gratitud y gradicimento.
Ora hende ta balora Dios, ta wordo demostra honor y respet na Dios, y nos ta balora tur locual Dios a haci pa nos, pero ora nos ta rechasa Dios henter nos bida ta cambia, pasobra scuridad ta drenta.
Esaki ta mi oracion, pa boso amor por abunda mas y mas ainda den conocemento, berdadero y tur disernimiento. Pa boso por aproba e cosnan cu ta exelente, pa ta sincero y sin culpa te na e dia di Cristo.( Filipensenan 1:9-11).
Cristo Hesus a stima cada un di nos asina tanto cu e a entrega su bida pa nos, e a bira pica , pa asina nos por a wordo hustifica den dje.
Pesey laga nos arepenti y pone Cristo Hesus na prome lugar den nos bida, y balora Cristo como e unico salbador di nos alma, pasobra di berdad E merece esey.